بۇگىننەن باستاپ اۆتوكولىك يەلەرىنە قىزمەت كورسەتەتىن حقكو-لار جۇمىستارىن قايتا باستادى

ازىرگە الماتى قالاسى، الماتى جانە جامبىل وبلىستارىنىڭ اۆتوحقكو-لارى عانا اشىلمايدى

بۇگىننەن باستاپ ەلىمىزدە، ءۇش ءوڭىردى قوسپاعاندا، اۆتوكولىك يەلەرىنە مەملەكەتتىك قىزمەتتەر كورسەتەتىن مامانداندىرىلعان حقكو-لار جۇمىسىن قايتا جانداندىرادى، دەپ حابارلايدى Almaty-akshamy.kz.

جۇمىس كەستەسى – ساعات 9.00-دەن 18.00-گە دەيىن (دۇيسەنبى-جۇما ارالىعىندا).

الماتى قالاسى، الماتى جانە جامبىل وبلىستارىنىڭ اۆتوحقكو-لارى عانا جۇمىستارىن ازىرگە باستامايدى. اتالعان وڭىرلەردە اۆتوقىزمەتتەردىڭ قايتا كورسەتىلە باستاعانى تۋرالى اقپارات قوسىمشا حابارلاناتىن بولادى.

«اۆتوقىزمەتتەر – سۇرانىسقا يە مەملەكەتتىك قىزمەتتەردىڭ ءبىرى. ءقازىر مامانداندىرىلعان حقكو-لار قايتا ىسكە قوسىلادى، ءبىز كليەنتتەردىڭ وندا كوپتەپ كەلەتىنىن بولجاپ وتىرمىز. سوندىقتان بۇل جاعدايعا تۇسىنىستىكپەن قاراۋلارىڭىزدى سۇرايمىن. سونداي-اق اۆتوكولىكتى Kaspi جانە Halyk Homebank بانك قوسىمشالارى ارقىلى قايتا رەسىمدەۋگە بولاتىنىن ەسكە سالامىن. اۆتوحقكو-لاردا كەزەك تۋدىرماۋ ءۇشىن وسى سەرۆيستەردى پايدالانۋعا كەڭەس بەرەمىن»، – دەدى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسقارما ءتوراعاسى ءادىل قوجىقوۆ.

مامانداندىرىلعان حقكو عيماراتىنا كىرۋ Ashyq قوسىمشاسى ارقىلى جۇزەگە اسىرىلادى. ەپيدەميولوگيالىق جاعدايعا بايلانىستى كليەنتتەر سانيتارلىق قاۋىپسىزدىك ەرەجەلەرىن - الەۋمەتتىك قاشىقتىقتى ساقتاپ، بەتپەردە تاعۋى كەرەك.