الماتى قالاسىندا ءبىر تاۋلىكتە 2410 ادام كوروناۆيرۋسقا قارسى ەكپە الدى.
بۇل تۋرالى قالالىق قوعامدىق دەنساۋلىق ساقتاۋ باسقارماسى ءمالىم ەتتى، دەپ حابارلايدى Almaty-akshamy.kz
«11 قاڭتار كۇنى 2410 الماتىلىق ۆاكسينا سالدىردى. ۆاكسينا سالدىرعاندار سانى بويىنشا الماتى قالاسى الدىڭعى ورىندا. بىلتىرعى جىلدىڭ 1 اقپانى مەن بيىلعى جىلدىڭ 11 قاڭتارى ارالىعىندا قالادا 1 052 525 تۇرعىن ۆاكسينانىڭ ءبىرىنشى كومپونەنتىن، 1015 921 ادام ەكىنشى كومپونەنتىن سالدىرعان. ونىڭ ىشىندە 123 454 ادامنىڭ جاسى 60-تان اسقان»،- دەپ حابارلادى قالالىق باسقارما.
بۇگىنگى تاڭدا Pfizer (Comirnaty) كومپانياسىنىڭ ەكپەسىن 31 632 ادام سالدىردى. ونىڭ ىشىندە 1 737 جۇكتى ايەل، 6396 بالا ەمىزەتىن انا جانە 23 499 ءجاسوسپىرىم بار. ريەۆاكسينالاۋدان 71 040 الماتىلىق ءوتتى. قالادا 132 پۋنكت جۇمىس ىستەپ تۇر. 762 ادامنان تۇراتىن 201 ەگۋ بريگاداسى بار.