ۆوكزالداردا پويىزداردىڭ كەشىگەتىنى حابارلانىپ وتىر. اقپارات 1433 انىقتاما قىزمەتى ارقىلى تاۋلىك بويى بەرىلەدى
ەلىمىزدە قولايسىز اۋا رايىنان بىرنەشە باعىتتاعى پويىزدار ۋاقىتىنان كەشىگىپ جاتىر، دەپ حابارلايدى Almaty-akshamy.kz «قازاقستان تەمىر جولى» ۇلتتىق كومپانياسىنىڭ باسپا ءسوز قىزمەتىنە سىلتەمە جاساپ.
«ۇلتتىق تاسىمالداۋشى قاۋىپسىزدىكتى قامتاماسىز ەتۋ ءۇشىن تەمىرجول ۋچاسكەلەرىندە قوزعالىس جىلدامدىعىنا شەكتەۋ قويدى»، - دەلىنگەن قتج حابارلاماسىندا.
كەشىگىپ جاتقان پويىزدار:
- №3/4 جانە № 9/10 «استانا – الماتى»؛
- №45/46 «پاۆلودار – تۇركىستان»؛
- №51/52 «الماتى – ورال»؛
- №65/66 «استانا – جەزقازعان»؛
- №71/72 جانە № 86/85 «استانا – شىمكەنت»؛
- №73/74 «الماتى – جەزقازعان»؛
- №105/106 «الماتى – پەتروپاۆل.
پويىزداردىڭ كەشىگۋى كەشە دە بولعان ەدى.
وسى ورايدا ۇلتتىق كومپانيا پويىزداردىڭ قوزعالىس كەستەسىن قالپىنا كەلتىرۋ ءۇشىن قاجەتتى شارالار قابىلدانىپ جاتقانىن ايتتى.
«ۆوكزالداردا پويىزداردىڭ كەشىگەتىنى حابارلانىپ وتىر. اقپارات 1433 انىقتاما قىزمەتى ارقىلى تاۋلىك بويى بەرىلەدى. ەگەر پويىز 3 ساعاتتان ارتىق كەشىكسە، جولاۋشىلارعا SMS حابارلاما جىبەرىلەدى»، - دەلىنگەن.
ودان بولەك، رەسمي اقپاراتتا ايتىلعانداي، پويىز بيلەتتەرىن كەرى قايتارۋ جايلى مالىمەتتى +7 (707) 270-36-64 (WhatsApp) نومىرىنەن بىلۋگە بولادى.
«كەشىككەن پويىزدىڭ ءار ساعاتى ءۇشىن بيلەت قۇنىنىڭ ءۇش پايىزى مولشەرىندە ايىپپۇل تولەنەدى. پويىز 6 ساعاتتان ارتىق كەشىكسە، مەيرامحانادا تەگىن تاماق بەرىلەدى. سول سياقتى ۆوكزالدارداعى تاماقتانۋ ورىندارى مەن ساۋدا نۇكتەلەرىنىڭ، سانيتارلىق ايماقتاردىڭ (اجەتحانالاردىڭ) ۇزدىكسىز جۇمىس ىستەۋى باقىلاۋدا»، - دەپ حابارلادى قازاقستان تەمىر جولى.