سارىمساققا ارنالعان بۇل ەرەكشە مەرەكە قاشان جانە قانداي جاعدايلاردا پايدا بولعانى بەلگىسىز. دەگەنمەن، ادامنىڭ ونى پايدالى قاسيەتتەرى ءۇشىن كەم دەگەندە 5 مىڭ جىل بويى پايدالانىپ كەلە جاتقانى انىقتالعان.
سارىمساقتى العاش بولىپ قازىرگى ءۇندىستان تۇرعىندارىنىڭ اتا-بابالارى وسىرە باستاعان. الايدا باستاپقىدا ولار سارىمساقتى تەك دارىلىك ماقساتتا قولدانعان، ونىڭ وتكىر يىسىنە بايلانىستى تاعامعا پايدالانۋ سيرەك كەزدەسكەن.
سارىمساقتى ريمدىكتەر دە، قىتايلار دا، امەريكالىق قۇرلىقتىڭ بايىرعى تۇرعىندارى دا وسىرگەن. ال مىسىرلىقتار ءۇشىن بۇل ەرەكشە مادەنيەت سانالعان – سارىمساقتى اقشا رەتىندە قولدانىپ، ءتىپتى پەرعاۋىنداردىڭ قابىرلەرىنە قوسا سالعان.
پيراميدالاردى سالۋمەن اينالىسقان قۇلداردىڭ راسيونىنا سارىمساق مىندەتتى تۇردە قوسىلعان، ويتكەنى ول توزىمدىلىكتى ارتتىرادى دەپ ەسەپتەلگەن. ەجەلگى گرەكيادا سارىمساقتان جاسالعان دامدەۋىش جاۋىنگەرلەر مەن سپورتشىلارعا كۇش جيناۋعا كومەكتەسكەن، ال قىزدار ونى كوز تيۋدەن جانە زۇلىم نيمفالاردان قورعانۋ ءۇشىن پايدالانعان.
سارىمساقتىڭ وتكىر دە حوش ءيىستى ءدامى ونى كوپتەگەن ەلدەردىڭ ۇلتتىق تاعامدارىندا تاپتىرماس ينگرەديەنتكە اينالدىرعان. سوندىقتان دا بۇل كوكونىستىڭ ءوز مەرەكەسىنىڭ پايدا بولۋى تاڭقالارلىق ەمەس. ونىڭ پايدا بولعان جەرى تۋرالى ناقتى دەرەكتەر بولماسا دا، مەرەكەنىڭ گەوگرافياسى جىلدان جىلعا كەڭەيىپ كەلەدى جانە بۇگىندە ول الەمنىڭ ءتۇرلى بۇرىشتارىندا تويلانىپ جاتىر.