الماتىلىقتار تاڭەرتەڭنەن بەرى اەس قۇرىلىسى ماسەلەلەرى بويىنشا رەفەرەندۋمعا قاتىسۋدا. سايلاۋشىلاردىڭ قاتارىندا تانىمال تۇلعالار، كوممۋنالدىق كاسىپورىنداردىڭ قاراپايىم ەڭبەك ادامدارى دا بار. ولاردىڭ كەيبىرەۋلەرى ءۇشىن بۇگىن – ادەتتەگى جۇمىس كۇنى.
ماسەلەن، مەتروپوليتەن ءماشينيستى نۇرجان مارقابايەۆ جۇمىس ۋاقىتى اياقتاعاننان كەيىن سايلاۋ ۋچاسكەسىنە كەلدى، دەپ حابارلايدى aqshamnews.kz.
ول جۇمىس كەستەسىنىڭ تىعىزدىعىنا قاراماستان، بۇل شەشىمنىڭ ەل ءۇشىن قانشالىقتى ماڭىزدى ەكەنىن تۇسىنەتىنىن اتاپ ءوتتى.
«مەن قازاقستانداعى جالعىز مەتروپوليتەننىڭ ەلەكتر پويىزىنىڭ ءماشينيستىمىن. ءبىزدىڭ بارلىق قۇرامدار ەلەكتر قۋاتىنىڭ كومەگىمەن قوزعالادى، سوندىقتان ءبىز رەفەرەندۋمنىڭ ماڭىزدىلىعىن وزگەلەردەن ارتىق تۇسىنەمىز. جۇمىستان كەيىن بىردەن سايلاۋ ۋچاسكەسىنە كەلدىم، ءتىپتى ۋاقىت جوعالتپاۋ ءۇشىن كيىمىمدى اۋىستىرمادىم»، - دەدى ول.
ايتا كەتەيىك، بۇگىن قازاقستان اۋماعىندا اەس قۇرىلىسى ماسەلەسى بويىنشا رەسپۋبليكالىق رەفەرەندۋم وتۋدە. الماتىلىقتار ءوز مەكەنجايى بويىنشا سايلاۋ ۋچاسكەلەرىنە بارىپ، ساعات 20:00-گە دەيىن داۋىس بەرە الادى.