مال ۇرلىعىن انىقتاۋ جانە ونىڭ جولىن كەسۋ ماقساتىندا ىشكى ىستەر مينيسترلىگى جەدەل-پروفيلاكتيكالىق ءىس-شارالارىن جۇيەلى تۇردە جۇرگىزەدى.
جىل باسىنان بەرى پوليسيا مال ۇرلىعىن كاسىپ ەتكەن 200-دەن استام ادامدى، ونىڭ ىشىندە 26 قىلمىستىق توپتى قۇرىقتادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
بيىل وسى قىلمىس ءۇشىن 65-تەن استام ادام سوتتالدى، ولاردىڭ جارتىسى تەمىر تورعا توعىتىلىپ، 5 جىلدان كوپ مەرزىم ارقالادى. قىلمىستىڭ بۇل تۇرىمەن كۇرەس جولعا قويىلعان. وڭىرلەردە تۇلىك يەلەرىنە ءتۇسىندىرۋ جۇمىستارى جۇرگىزىلىپ، مال بازارلارى مەن ەت ونىمدەرىن ساتاتىن ورىندار، مال سويۋ سەحتارى ۇنەمى تەكسەرىلەدى.
الماتى، تۇركىستان جانە باتىس قازاقستان وبلىستارىندا مال ۇرلىعىن كاسىپ ەتكەن قىلمىستىق توپتار انىقتالدى. قاسكۇنەمدەر ۇرلانعان مالدى جۇك كولىگىنە تيەپ، اكەتىپ وتىرعان. نەگىزگى كۇدىكتىلەردەن بولەك تاسىمالداۋشىلار جانە ساتىپ الۋشىلار قۇرىقتالدى. ەستەرىڭىزگە سالا كەتەيىك، 2019 جىلى مەملەكەت باسشىسىنىڭ تاپسىرماسى بويىنشا مال ۇرلىعى ءۇشىن جاۋاپكەرشىلىك كۇشەيتىلدى. قىلمىستىق كودەكسكە “مال ۇرلىعى” دەگەن جەكە باپ ەنگىزىلدى. ناتيجەسىندە قازاقستاندا سوڭعى 5 جىلدا مال ۇرلىعىنىڭ سانى 32%-عا تومەندەدى.
مال ۇرلىعىنىڭ الدىن الۋ ءۇشىن ءىىم قاۋىپسىزدىك شارالارىن ۇستانۋعا شاقىرادى: – مالدى قاراۋسىز قالدىرماڭىز؛ – اسىل تۇقىمدى مالدى باقىلاۋدىڭ زاماناۋي ادىستەرىن قولدانىڭىز؛ – مالدى مىندەتتى تۇردە تاڭبالاڭىز.