بۇگىن مەملەكەتتىك رامىزدەردىڭ قابىلدانعانىنا 33 جىل تولدى.
قازاقستان رەسپۋبليكاسىنىڭ مەملەكەتتىك رامىزدەرى - تۋ، ەلتاڭبا جانە ءانۇران - ەلىمىزدىڭ ەگەمەندىگى مەن ۇلتتىق بىرەگەيلىگىن بىلدىرەتىن اسا ماڭىزدى نىشاندار. ولاردىڭ تاريحى - قازاقستاننىڭ تاۋەلسىز ەل رەتىندە قالىپتاسۋ جولىنداعى ساياسي جانە رۋحاني دامۋىنىڭ كورىنىسى. قازاقستان 1991 جىلى تاۋەلسىزدىگىن جاريالاعاننان كەيىن، جاس مەملەكەتكە ءوزىنىڭ دەربەس رامىزدەرىن جاساۋ قاجەتتىگى تۋىندادى. 1992 جىلى 4 ماۋسىمدا قازاقستان رەسپۋبليكاسىنىڭ جوعارعى كەڭەسى مەملەكەتتىك تۋ، ەلتاڭبا جانە ءانۇران تۋرالى ارنايى قاۋلى قابىلداپ، ولار رەسمي تۇردە بەكىتىلدى. بۇل كۇن ەلىمىزدىڭ تاريحىنداعى ماڭىزدى بەلەس بولدى جانە كەيىنىرەك مەملەكەتتىك رامىزدەر كۇنى رەتىندە بەلگىلەندى.
مەملەكەتتىك تۋ
قازىرگى تۋدىڭ اۆتورى - بەلگىلى سۋرەتشى شاكەن نيازبەكوۆ. تۋدىڭ نەگىزگى ءتۇسى – كوگىلدىر (اشىق كوك)، ول بەيبىتشىلىكتى، اشىق اسپاندى جانە تۇركى حالىقتارىنا ءتان ەركىندىك ۇعىمىن بىلدىرەدى. تۋدىڭ ورتاسىندا كۇن بەينەسى مەن ونىڭ استىندا قىران قۇس (بۇركىت) بەينەلەنگەن. بۇل - جارقىن بولاشاققا ۇمتىلۋ مەن ەركىندىكتىڭ سيمۆولى. ال سول جاعىندا ورنالاسقان ۇلتتىق ورنەك - قازاق حالقىنىڭ مادەني-رۋحاني مۇراسىن تانىتادى.
ەلتاڭبا
مەملەكەتتىك ەلتاڭبا بايقاۋىنا 245 جوبا ۇسىنىلعان. سونىڭ ىشىنەن جانداربەك مالىبەكوۆ پەن شوت-امان ءۋاليحانوۆ ازىرلەگەن نۇسقا تاڭدالدى. ەلتاڭبانىڭ جۇرەگىندە شاڭىراق بەينەلەنگەن - بۇل وتباسىنىڭ، بىرلىكتىڭ، مەملەكەتتىلىكتىڭ سيمۆولى. ونى ۋىقتار قورشاپ تۇر، ولار قوعامنىڭ تۇراقتىلىعىن بىلدىرەدى. ەكى جاعىندا قاناتتى تۇلپارلار بەينەلەنگەن. بۇل - حالىقتىڭ ارمان-مۇراتىن، قيالىن بىلدىرەتىن ميفولوگيالىق بەينە. جوعارعى جاعىندا جۇلدىز، تومەنگى بولىگىندە «QAZAQSTAN» جازۋى ورنالاسقان. ەلتاڭبا - قازاق حالقىنىڭ دۇنيەتانىمىن، تاريحىن جانە بولاشاققا دەگەن سەنىمىن كورسەتەتىن كۇردەلى ءارى تەرەڭ مازمۇندى نىشان.
ءانۇران
1992 جىلى قابىلدانعان العاشقى مەملەكەتتىك ءانۇراننىڭ مۋزىكاسى مۇقان تولەبايەۆ، ەۆگەنيي برۋسيلوۆسكيي جانە لاتيف حاميديگە تيەسىلى بولاتىن. ال ماتىنىنە بىرنەشە اقىن اتسالىسقان. دەگەنمەن حالىق اراسىندا كەڭىنەن تارالعان، رۋحتى كوتەرەتىن «مەنىڭ قازاقستانىم» ءانى 2006 جىلى ءانۇران رەتىندە جاڭارتىلىپ بەكىتىلدى. ءاننىڭ اۆتورى - كومپوزيتور ءشامشى قالداياقوۆ، ءسوزىن جازعان - جۇمەكەن ناجىمەدەنوۆ. تاۋەلسىزدىك داۋىرىندە ماتىنگە نۇرسۇلتان نازاربايەۆ تۇزەتۋلەر ەنگىزىپ، ءانۇراننىڭ رەسمي ءماتىنى سول كۇيدە قابىلداندى.
زاڭناما
قازاقستان رەسپۋبليكاسىنىڭ كونستيتۋسياسىندا جانە «مەملەكەتتىك رامىزدەر تۋرالى» زاڭدا رامىزدەرگە قاتىستى ناقتى نورمالار بەكىتىلگەن. ءار ازامات ولاردى قۇرمەتتەۋگە، دۇرىس قولدانۋعا مىندەتتى. تۋدى نەمەسە ءانۇراندى بۇرمالاۋ - زاڭمەن جازالاناتىن قۇقىقبۇزۋشىلىق.
قىلمىستىق جاۋاپكەرشىلىك
ق ر قىلمىستىق كودەكسىنىڭ 372-بابىنا سايكەس، قازاقستان رەسپۋبليكاسىنىڭ مەملەكەتتىك تۋىن، مەملەكەتتىك ەلتاڭباسىن نەمەسە مەملەكەتتىك ءانۇرانىن قورلاۋ - قىلمىس بولىپ سانالادى. بۇل باپ بويىنشا:
رامىزدەردى قورلاعان ادام 2000 ايلىق ەسەپتىك كورسەتكىشكە (اەك) دەيىنگى مولشەردە ايىپپۇلعا، نە سول مولشەردە تۇزەۋ جۇمىستارىنا، نە 600 ساعاتقا دەيىنگى قوعامدىق جۇمىستارعا، نە 2 جىلعا دەيىن باس بوستاندىعىن شەكتەۋگە نەمەسە باس بوستاندىعىنان ايىرۋعا تارتىلۋى مۇمكىن.
اكىمشىلىك جازا
ەگەر ارەكەت قىلمىستىق قۇرامعا جەتپەسە، كەي جاعدايدا بۇل قۇقىقبۇزۋشىلىق اكىمشىلىك قۇقىقبۇزۋشىلىق تۋرالى كودەكستىڭ 434-بابى (“ۇساق بۇزاقىلىق”) بويىنشا قارالۋى مۇمكىن. مۇندا دا ايىپپۇل نەمەسە قاماۋعا الۋ تۇرىندەگى جازا قولدانىلادى.
حالىقارالىق ارەنا
قازاقستاننىڭ مەملەكەتتىك رامىزدەرى حالىقارالىق ارەنادا ەلىمىزدىڭ بەت-بەينەسىن تانىتادى. الەمدىك سپورتتىق سايىستاردا كوك تۋ كوتەرىلىپ، ءانۇران ورىندالعان ساتتەر - ەل ابىرويىنىڭ كورىنىسى. بۇل - رامىزدەردىڭ تەك ىشكى ەمەس، سىرتقى ساياساتتاعى دا ءرولىن كورسەتەدى.