ونلاين ءوتىنىم بەرۋدە نە ىستەۋ كەرەك؟
مەملەكەتتىك ءبىلىم بەرۋ گرانتىن بەرۋ جونىندەگى كونكۋرسقا قاتىسۋ ءۇشىن قۇجاتتاردى قابىلداۋ 2024 جىلعى 13-24 شىلدە ارالىعىندا جۇزەگە اسىرىلادى، دەپ حابارلايدى Almaty-akshamy.kz
"كونكۋرسقا قاتىسۋ ءۇشىن ءوتىنىشتى جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ قابىلداۋ كوميسسيالارى ارقىلى، سونداي-اق، ونلاين رەجيمىندە "ەلەكتروندىق ۇكىمەت" پورتالى ارقىلى بەرۋگە بولادى"، دەلىنگەن ق ر عىلىم جانە جوعارى ءبىلىم مينيسترلىگىنىڭ اقپاراتىندا.
مينيسترلىكتىڭ مالىمەتىنشە، 2023-2024 وقۋ جىلىنا جوعارى ءبىلىمنىڭ ءبىلىم بەرۋ باعدارلامالارى بويىنشا وقۋ ءۇشىن بارلىعى 78219 گرانت ءبولىندى، ونىڭ ىشىندە قازاقستان رەسپۋبليكاسىنىڭ ۇكىمەتى ايقىنداعان وڭىرلەرگە قونىس اۋداراتىن اۋىل جاستارى قاتارىنان قازاقستان رەسپۋبليكاسىنىڭ ازاماتتارىن وقىتۋعا 3903 گرانت ءبولىندى.
سونداي-اق، حالقى تىعىز ورنالاسقان، باتىس جانە جاڭادان قۇرىلعان وڭىرلەردەن جاستاردى وقىتۋ ءۇشىن 5000 نىسانالى گرانت ءبولىندى، ونىڭ ىشىندە:
اتىراۋ وبلىسىنان كەلگەندەر ءۇشىن – 1500 گرانت،
ماڭعىستاۋ وبلىسىنان – 2000،
تۇركىستان وبلىسىنان – 600،
اباي قالاسىنان – 300،
شىمكەنت قالاسىنان – 300،
جەتىسۋ قالاسىنان – 300،
ۇلىتاۋ قالاسىنان - 300 گرانت دايارلاندى.
ولار مىناداي باعىتتاردى قامتيدى:
پەداگوگيكالىق عىلىمدار،
ماتەماتيكا جانە ستاتيستيكا،
جاراتىلىستانۋ عىلىمدارى،
اقپاراتتىق-كوممۋنيكاسيالىق تەحنولوگيالار،
ينجەنەرلىك، وڭدەۋ جانە قۇرىلىس سالالارى.
"شالعاي وڭىرلەردەن كەلگەن تالاپكەرلەرگە ىڭعايلى بولۋ ءۇشىن جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىندا ۆيرتۋالدى قابىلداۋ كوميسسيالارى جۇمىس ىستەيتىن بولادى، ولار بەينەبايلانىس ارقىلى كونسۋلتاسيا بەرەدى جانە كونكۋرسقا قۇجاتتاردى تاپسىرۋعا كومەكتەسەدى. ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن ەڭ تومەنگى ۇپايلار مىنا سىلتەمە بويىنشا قولجەتىمدى"، دەلىنگەن حابارلامادا.
سونداي-اق مينيسترلىك ەلەكتروندىق ۇكىمەت پورتالىندا قۇجاتتاردى تاپسىرۋ كەزىندە پايدالانۋشىلاردىڭ ءبىر مەزگىلدە جۇگىنۋىنە بايلانىستى تەحنيكالىق ىركىلىستەر بايقالۋى مۇمكىن ەكەنىن ەسكەرتەدى.
"ونلاين ءوتىنىم بەرۋدە پروبلەمالار انىقتالعان جاعدايدا، 1414 ءبىرىڭعاي بايلانىس ورتالىعىنا، سونداي-اق قوسىمشا اقپارات الۋ ءۇشىن جوعارى جانە جوعارى وقۋ ورنىنان كەيىنگى ءبىلىم كوميتەتىنە مىنا تەلەفوندار ارقىلى حابارلاسا الاسىز: 8 (7172) 741670، 8 (7172) 742525، جوعارى ءبىلىم بەرۋدىڭ ءبىرىڭعاي پلاتفورماسىن تەحنيكالىق قولداۋ ورتالىعى 8 (7172) 47-25-25، ىشكى 702، 504 جانە "ۇلتتىق تەستىلەۋ ورتالىعى" رمقك call-ورتالىعى - 8 (7172) 695069".