سەبەبى شەكاراعا جاقىن ورنالاسقاندىقتان كورشى ەلدەر رۇقسات ەتپەيدى.
ەلىمىزدە 1 729 ستارلينك تەرمينالى مەكتەپتەرگە ۇلەستىرىلگەن، دەپ حابارلايدى Almaty-akshamy.kz
ءبىراق سونىڭ ىشىندە 136 تەرمينال جۇمىس ىستەمەي تۇر. بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ مالىمدەدى.
ونىڭ ايتۋىنشا، مامىردىڭ باسىندا شامامەن 600 ستارلينك تەرمينالى مەكتەپتەرگە تاراتىلعان بولسا، بۇگىندە اراعا 2 اي سالىپ، ونىڭ سانى 1 729-عا جەتىپ وتىر. تەك ەكى جاعدايعا قاتىستى ماسەلە تۋىنداپ تۇر.
"مەكتەپتەرگە ورناتىلعان 136 ستارلينك تەرمينالى ءقازىر جۇمىس ىستەمەي تۇر. سەبەبى ول مەكتەپتەر شەكارالاس اۋماقتاردا ورنالاسقاندىقتان، ينتەرنەتتىڭ تارالۋ اۋماعى سولتۇستىك پەن شىعىستاعى كورشى ەلدەردىڭ اۋماعىنا ءوتىپ كەتەدى. ال كورشى ەلدەر ءوز تەرريتوريالارىنا ءتۇسىپ تۇرۋىنا رۇقسات ەتپەي وتىر. سوعان بايلانىستى ول تەرمينالدار قوسىلماي تۇر. ەندى سول تارالۋ اۋماعى تەك قازاقستان تەرريتورياسىمەن شەكتەلەتىندەي ەتۋ ءۇشىن ستارلينكپەن كەلىسسوز جۇرگىزىپ جاتىرمىز. ەگەر ونىڭ تەحنيكالىق شەشىمى تابىلماسا، وندا ول تەرمينالداردى باسقا مەكتەپتەرگە تاراتامىز"،- دەدى مينيستر.
ودان بولەك، تاعى 14 ستارلينك جوندەۋ جۇرگىزىلىپ جاتقان مەكتەپتەرگە ورناتىلعان. جاسۇلان مادييەۆتىڭ ايتۋىنشا، سول جۇمىستار جازدىڭ سوڭىنا دەيىن ءبىتۋى كەرەك، ءسويتىپ تەرمينالدار دا ىسكە قوسىلادى.