الماتى الەمدەگى ستۋدەنتتەرگە ارنالعان ەڭ جاقسى 100 قالانىڭ قاتارىنا ەندى.
حالىقارالىق ستۋدەنتتەر كۇنى جىل سايىن 17 قاراشادا تويلانادى. مەرەكە 1941 جىلى فاشيزمگە قارسى كۇرەسكەن ەلدەر ستۋدەنتتەرىنىڭ لوندوندا وتكەن حالىقارالىق كەزدەسۋىندە بەكىتىلدى، ءبىراق 1946 جىلدان باستاپ تويلانا باستادى. بۇل كۇن چەحتىڭ پاتريوت ستۋدەنتتەرىن ەسكە الۋعا ارنالدى، دەپ حابارلايدى Almaty-akshamy.kz
ارينە، بۇل مەرەكە جاستىقپەن، رومانتيكامەن جانە كوڭىل كوتەرۋمەن بايلانىستى بولۋى كەرەك، ءبىراق ونىڭ تاريحى ەكىنشى دۇنيەجۇزىلىك سوعىس كەزىندە چەحوسلوۆاكيادا باستالعان قايعىلى وقيعالارمەن بايلانىستى.
Calend.ru –دىڭ مالىمەتىنشە، 1939 جىلى 28 قازاندا فاشيستەر باسىپ العان چەحوسلوۆاكيادا پراگالىق ستۋدەنتتەر مەن ولاردىڭ ۇستازدارى چەحوسلوۆاكيا مەملەكەتىنىڭ قۇرىلعان كۇنىن (1918 ج. 28 قازان) مەرەكەلەۋگە شەرۋگە شىقتى. باسقىنشىلاردىڭ بولىمشەلەرى دەمونستراسيانى تاراتتى، ال مەديسينا فاكۋلتەتىنىڭ ستۋدەنتى يان وپلەتالدى اتىپ ءولتىردى.
1939 جىلى 15 قاراشاداعى يان وپلەتالدى جەرلەۋ ءراسىمى قايتادان نارازىلىق اكسياسىنا اينالدى. ونداعان دەمونسترانتتار قاماۋعا الىندى. 17 قاراشادا ستۋدەنتتەر جاتاقحانالارى قورشاۋعا الىندى. 1200-دەن استام ستۋدەنت تۇتقىندالىپ، زاكسەنحاۋزەن كونسلاگەرىنە تۇرمەگە جابىلدى. پراگانىڭ رۋزينە اۋدانىنداعى تۇرمەنىڭ زىندانىندا توعىز ستۋدەنت پەن ستۋدەنتتىك قوزعالىس بەلسەندىسى سوتسىز ءولىم جازاسىنا كەسىلدى. چەحيانىڭ بارلىق ۋنيۆەرسيتەتتەرى گيتلەردىڭ بۇيرىعىمەن سوعىس اياقتالعانعا دەيىن جابىلدى.
وسى وقيعالاردىڭ قۇرمەتىنە حالىقارالىق ستۋدەنتتەر كۇنى بەلگىلەندى، ال سوعىستان كەيىنگى جىلداردا ونىڭ تويلانۋى 1946 جىلى پراگادا وتكەن بۇكىلالەمدىك ستۋدەنتتەر كونگرەسىندە بەكىتىلدى جانە سول ۋاقىتتان بەرى ول جىل سايىن اتالىپ وتەدى.
قازىرگى ۋاقىتتا ستۋدەنتتەر كۇنى الەمنىڭ كوپتەگەن ەلدەرىندە تويلانادى جانە بۇل كۇندى مەرەكەلەۋ باعدارلامالارى ءار ءتۇرلى بولعانىمەن، ستۋدەنتتەر اراسىندا وتە تانىمال. بىردە-بىر ۋنيۆەرسيتەت وسى مەرەكەدەن تىس قالمايدى. ال بۇل كۇننىڭ الدىندا بەيبىتشىلىك پەن دوستىق ءۇشىن كۇرەستىڭ حالىقارالىق ستۋدەنتتىك اپتالىعى (10-17 قاراشا) وتەدى.
بريتاندىق Studee كونسالتينگتىك كومپانياسىنىڭ نۇسقاسى بويىنشا الماتى ستۋدەنتتەرگە ارنالعان الەمدەگى ەڭ جاقسى 100 قالانىڭ قاتارىنا ەندى. تۇرعىن ءۇيدىڭ ورتاشا قۇنى مەن جالدامالى تۇرعىن ءۇي، ينتەرنەت جىلدامدىعى، حالىقارالىق رەيتينگكە ەنگەن ۋنيۆەرسيتەتتەردىڭ سانى سىندى كريتەرييلەر بويىنشا قالامىز 76-ورىنعا تۇراقتادى. بۇل كورسەتكىش بويىنشا الماتى نيۋ-يوركتەن كەيىن، ۆارشاۆانىڭ الدىندا تۇر. ايتپاقشى، بۇل رەيتينگتە ماسكەۋ 84ء-شى ورىندا، ال سانكت-پەتەربۋرگ 98ء-شى ورىندا.