ارابيكا سورتىنداعى كوفە باعاسى نيۋ-يوركتەگى ICE Futures بيرجاسىنىڭ ساۋدا دەرەكتەرىنە سايكەس 10 جىلدىق رەكوردىن جاڭارتتى
قاراشانىڭ ورتاسىنان بەرى فيۋچەرستەر ءبىر فۋنت ءۇشىن 2،2 دوللاردان (0،45 كەلى) جوعارى بولدى. بۇعان دەيىن وسى كورسەتكىشتەن جوعارى كوفە باعاسى 2012 جىلدىڭ قاڭتارىندا تىركەلگەن. سەيسەنبى، 16 قاراشاداعى ساۋدا-ساتتىق بارىسىندا جەلتوقسانداعى فيۋچەرستەردىڭ ءبىر فۋنتى 2،24 دوللارعا دەيىن كوتەرىلدى، دەپ حابارلايدى Almaty-akshamy.kz
باعانىڭ وسۋىنە ءىرى وندىرۋشىلەر تاراپىنان جەتكىزىلىم بولماۋى سەبەپ بولدى. برازيليادا اياز، قۇرعاقشىلىق بولدى، كولۋمبياداعى داقىلدار قاتتى جاۋىن-شاشىننان زارداپ شەكتى، ال ۆەتنام ەكسپورتى جۇك تاسىمالداۋ كونتەينەرلەرىنىڭ جەتىسپەۋشىلىگىنەن تومەندەگەن.
اقش سوڭعى ەسەبىندە الەمدىك كوفە قورى بىلتىرعىمەن سالىستىرعاندا 77 پايىزعا تومەندەگەنىن ايتتى. كولىك شىعىندارىنىڭ جوعارى بولۋىنا، تىڭايتقىشتاردىڭ قىمباتتاۋىنا جانە جۇمىس كۇشىنىڭ تاپشىلىعىنا بايلانىستى كوفە باعاسى كوتەرىلە بەرەدى.
ايتا كەتەيىك، قاراشانىڭ باسىندا بىرىككەن ۇلتتار ۇيىمىنىڭ ازىق-تۇلىك جانە اۋىل شارۋاشىلىعى ۇيىمى (فاو) ازىق-تۇلىكتىڭ الەمدىك باعاسى رەكوردتىق دەڭگەيگە كوتەرىلىپ، 2011 جىلعى كورسەتكىشتەن اسىپ كەتكەنىن حابارلاعان بولاتىن. قازاندا ەڭ سۇرانىسقا يە ازىق-تۇلىك تاۋارلارىنىڭ الەمدىك باعاسىنىڭ اۋىتقۋىن اي سايىن قاداعالايتىن ازىق-تۇلىك باعاسى يندەكسىنىڭ ورتاشا ءمانى قىركۇيەكپەن سالىستىرعاندا 3،9 پايىزعا ءوستى.
