ناۋقاستارعا بارلىق قامقورلىقتىڭ 80%-ىن ورتا مەديسينا قىزمەتكەرلەرى اتقارادى
جىل سايىن 12 مامىردا فلورەنس نايتينگەيل ۇسىنعان حالىقارالىق مەيىرگەر كۇنى اتاپ وتىلەدى. ول مەيىرگەر ءىسىنىڭ نەگىزىن قالاۋشى بولىپ سانالادى، ول قوعامدىق سانادا جانە مەيىرگەردىڭ قوعام دەنساۋلىعىنداعى ءرولى مەن ورنى تۋرالى كوزقاراستاردا توڭكەرىس جاسادى. بۇگىندە بۇل كاسىپتىك مەرەكە 50-دەن استام ەلدە، ونىڭ ىشىندە قازاقستاندا دا اتاپ وتىلەدى، دەپ حابارلايدى Almaty-akshamy.kz.
مەيىرگەرلەردىڭ دەنساۋلىق ساقتاۋ جۇيەسىندەگى ءرولى جىل سايىن ماڭىزدى بولا تۇسۋدە. ۋاقىت تالاپتارىنا سايكەس ورتا مەديسينا قىزمەتكەرلەرىنىڭ ەمدەۋ پروسەسىنە قاتىسۋى ارتىپ كەلەدى، پاسيەنتتىڭ دەنساۋلىعى ءۇشىن كاسىپتىك جاۋاپكەرشىلىك سياقتى فۋنكسيونالى كەڭەيۋدە. شىنىندا دا، ناۋقاستارعا بارلىق قامقورلىقتىڭ 80%-ىن ورتا مەديسينا قىزمەتكەرلەرى اتقارادى.
مەيىرگەرلەر دەنساۋلىق ساقتاۋ جۇيەسىندەگى ەڭ كوپ كاسىپتىك توپتاردىڭ ءبىرىن قۇرايدى. بۇگىندە قازاقستاننىڭ مەديسينالىق ۇيىمدارىندا 188 مىڭنان استام، اۋىلدا 54 مىڭنان استام، باستاپقى بۋىن دەڭگەيىندە 65 مىڭ ورتا مەديسينا قىزمەتكەرى جۇمىس ىستەيدى.
سونىمەن قاتار، بولاشاق ورتا مەديسينا قىزمەتكەرلەرىن دايارلاۋمەن 91 مەديسينالىق كوللەدج اينالىسادى، ونىڭ 24ء-ى مەملەكەتتىك جانە 67ء-سى مەملەكەتتىك ەمەس، 37ء-سى «جوعارى» مەديسينالىق كوللەدج مارتەبەسىنە يە. 2022 جىلدىڭ دەرەكتەرى بويىنشا كوللەدجدەردە 103 مىڭنان استام ستۋدەنت وقيدى، مەملەكەتتىك ءبىلىم بەرۋ تاپسىرىسى بويىنشا 23 400 ءبىلىم الۋشى وقۋعا ءتۇستى. قازاقستاندىق كوللەدجدەر 9 ماماندىق بويىنشا: ەمدەۋ ءىسى، اكۋشەرلىك ءىس، مەيىرگەر ءىسى، ستوماتولوگيا، ورتوپەديالىق ستوماتولوگيا، گيگيەنا-ەپيدەميولوگيا، زەرتحانالىق دياگنوستيكا، فارماسيا، مەديسينالىق وپتيكا بويىنشا دايارلايدى. قازاقستاننىڭ بارلىق وڭىرلەرىندە مەرەكە قارساڭىندا فورۋمدار، عىلىمي-پراكتيكالىق كونفەرەنسيالار وتكىزىلۋدە، وندا مەيىرگەرلەر، اكۋشەرلەر، فەلدشەرلەر، زەرتحاناشىلار ءتۇرلى تاقىرىپتاردا باياندامالار جاساي وتىرىپ قاتىسۋدا، سونداي-اق ق ر دەنساۋلىق ساقتاۋ مينيسترلىگىنىڭ توسبەلگىلەرىن، مەدالدارىن، گراموتالارىن جانە العىس حاتتارىن الادى،ونىڭ ىشىندە «ەڭبەك ارداگەرى» - 15، «دەنساۋلىق ساقتاۋ ءىسىنىڭ ۇزدىگى» - 30، «دەنساۋلىق ساقتاۋ ىسىنە قوسقان ۇلەسى ءۇشىن» - 27، «قۇرمەت گراموتاسى»- 96 جانە «العىس حات» - 98.