بۇگىن ەلوردادا ساعات 19:00-دە دۇنيەجۇزىلىك كوشپەندىلەر ويىندارىنىڭ تىكەلەي ترانسلياسياسى باستالادى، دەپ حابارلايدى aqshamnews.kz.
V دۇنيەجۇزىلىك كوشپەندىلەر ويىندارى استانادا 8-13 قىركۇيەك ارالىعىندا وتەدى. وعان الەمنىڭ 89 ەلىنەن 2500-دەن استام قاتىسۋشى قاتىسادى.
شارانىڭ اشىلۋ ءراسىمى «استانا ارەنا» ستاديونىندا وتەدى.
ق ر مادەنيەت جانە اقپارات مينيسترلىگىنىڭ حابارلاۋىنشا، شوۋعا 3 مىڭ ارتيست قاتىسادى. شارانىڭ اشىلۋ ءراسىمىنىڭ الدىندا، 8 قىركۇيەك كۇنى ساعات 16:00-دە قازاقستاندىق ەسترادا جۇلدىزدارىنىڭ قاتىسۋىمەن كونسەرت وتەدى. كونسەرت اياقتالىسىمەن ساعات 19:00-دە رەسمي اشىلۋ سالتاناتى بولادى. شوۋ بارىسىندا ساحنا مەن مۋلتيمەديانىڭ زاماناۋي تەحنولوگيالارى قولدىنىلا وتىرىپ، ەكى ساعاتتىق مۋزىكالىق تەاترلاندىرىلعان قويىلىم ۇيىمداستىرىلادى.
قالىپتاسقان ءداستۇر بويىنشا اشىلۋ راسىمىندە سپورتتىق دەلەگاسيالاردىڭ شەرۋى وتەدى. سوڭىندا قازاقستاننىڭ حالىق ءارتىسى ديماش قۇدايبەرگەننىڭ ورىنداۋىنداعى حالىقتار دوستىعى مەن بىرلىگى تۋرالى مۋزىكالىق كومپوزياسيا ورىندالادى.
ويىندارعا قاتىسۋشىلار مەن قوناقتاردى قابىلداۋ ءۇشىن 20 ءقوناقۇي مەن 331 كولىك قاراستىرىلعان. مەديسينالىق شتابتا 150 مەديسينالىق قىزمەتكەر، 23 ۆەتەرينار جۇمىس ىستەيدى. 1 300 ۆولونتەر قىزمەت اتقارادى. سونداي-اق باق-قا ارنالعان اككرەديتاسياعا جالپى 64 ەلدەن 1 185 ءوتىنىم تۇسكەن.
ويىندار بىرنەشە جەردە وتەدى: «دۋمان» قوناق ءۇيى، «قازانات» يپپودرومى، ەتنواۋىل، ج. ۇشكەمپىروۆ اتىنداعى جەكپە-جەك سارايى جانە «الاۋ» مۇزايدىنى مەن «استانا ارەنا» كەشەنىندە.