بۇگىن بەس بوكسشىمىز فينالعا شىعۋ ءۇشىن تالاسادى

ساعات 15.00-دە باستالاتىن كۇندىزگى سەسسيادا العاشقى بولىپ سانجار تاشكەنباي شىعادى

تاشكەنتتە ەرلەر اراسىندا بوكستان ءوتىپ جاتقان الەم چەمپيوناتىندا بۇگىن بەس قازاقستاندىق سپورتشى جارتىلاي فينالدا ونەر كورسەتەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قازاقستاندىقتاردان استانا ۋاقىتىمەن ساعات 15.00-دە باستالاتىن كۇندىزگى سەسسيادا العاشقى بولىپ سانجار تاشكەنباي شىعادى.

سانجار اسا جەڭىل سالماقتا رەسەيدىڭ ءتورت دۇركىن چەمپيونى ەدموند حۋدويانمەن قولعاپ تۇيىستىرەدى.

ىلە-شالا ماحمۇد سابىرحان 54 كەلىگە دەيىنگى سالماقتا 2017 جىلعى الەم چەمپيونى ءارى ەكى مارتە جۇلدەگەرى، كۋبالىق يوسۆاني ۆەيتيامەن فينالعا شىعۋ ءۇشىن تالاسادى.

دۋلات بەكباۋوۆقا (67 كگ) گرۋزيالىق لاشا گۋرۋلي قارسى تۇرماق.

ساعات 19.00-دە باستالاتىن كەشكى سەسسيادا ۇلتتىق قۇراما كاپيتانى اسلانبەك شىمبەرگەنوۆ (71 كگ) ءۇندىستاندىق نيشانت ديەۆتەن وتۋگە تىرىسپاق. ال نۇربەك ورالباي (80 كگ) توكيو وليمپياداسىنىڭ قولا جۇلدەگەرى، رەسەيلىك يمام حاتايەۆپەن جۇدىرىقتاسادى.

ەسكە سالا كەتەيىك، بۇدان بۇرىن جۇڭگو قازاعى توقتاربەك تاڭاتحاننىڭ ەكى دۇركىن وليمپيادا جەڭىمپازىن ۇتقانىن جازعان بولاتىنبىز.

سونداي-اق سانجار تاشكەنباي بوكستان الەم چەمپيوناتىنىڭ جارتىلاي فينالىنا ءوتتى.

قانشا قازاقستاندىقتىڭ 1/2 فينالعا وتكەنى بەلگىلى بولدى.