الماتى بوتانيكالىق باعىندا مەديسينادا كەڭىنەن قولدانىلاتىن وسىمدىك وسەدى

گۇلدەردىڭ ءتۇسى كوبىنەسە جاسىل-قوڭىر

الماتى بوتانيكالىق باعىندا 1989 جىلدان بەرى دارىلىك وسىمدىك – مەديسينادا كەڭىنەن قولدانىلاتىن سيەۆەرسوۆ كورولكوۆيا وسىمدىگى ءوسىپ جاتىر، دەپ حابارلايدى Almaty-akshamy.kz.

قازاقستان تەرريتورياسى دارىلىك وسىمدىكتەرگە باي. ولاردىڭ اراسىندا رەسمي مەديسينادا قابىلدانعان، حالىق مەديسيناسىندا كەڭىنەن قولدانىلاتىن وسىمدىكتەر دە بار. سولاردىڭ ءبىرى – ورتالىق ازيانىڭ ەندەميگى سيەۆەرسوۆ كورولكوۆيا. ولار تاۋ ەتەگىندە، سازدى جانە تاستى بەتكەيلەردە وسەدى.

بوتانيكالىق باقتىڭ مالىمەتىنشە، سيەۆەرسوۆ كورولكوۆيا (لات. Fritillaria sewerzówii) لالاگۇلدىلەر تۇقىمداسىنىڭ ريابچيك تۇرىنە جاتادى، كوپ جىلدىق شوپتەسىن وسىمدىك. وسىمدىك اۋەسقوي بوتانيك نيكولاي كورولكوۆ ەسىمىمەن اتالادى، ال ءتۇرىنىڭ اتاۋى رەسەيلىك زووگەوگراف جانە ەكولوگ نيكولاي سيەۆەرسوۆتىڭ قۇرمەتىنە بەرىلگەن.

«سيەۆەرسوۆ كورولكوۆيا بيىكتىگى 25-50 سم جەتەدى. ساباعى ءتۇزۋ، جالاڭاش، قالىڭ، بالاما جاپىراقتارى بار، ولار كوكشىل گۇلمەن جابىلعان. گۇلشوعىرى – كوپتەگەن قوڭىراۋ ءتارىزدى سالبىراعان گۇلدەرى بار. تومەن جاقتاعى گۇلدەرى ۇلكەندەۋ، ۇزىندىعى 2،5 سم-گە دەيىن، قوس جىنىستى، ۇستىڭگىلەرى ستامينالدى بولادى. گۇلدەردىڭ ءتۇسى كوبىنەسە جاسىل-قوڭىر، كەيدە قارا-قوڭىر نەمەسە التىن-سارى بولادى. قۇرامىندا 40% دەيىن كراحمال جانە 1% الكالويدتارى بار. قازاق، وزبەك حالىق مەديسيناسىندا ادامنان تەر شىعاراتىن وسىمدىك رەتىندە قولدانىلىپ كەلەدى»، - دەپ حابارلادى زووباقتىڭ ۇجىمى.

قازىرگى ۋاقىتتا سيەۆەرسوۆ كورولكوۆيا بوتانيكالىق باقتىڭ دارىلىك وسىمدىكتەردى جيناۋ ايماعىندا وسەدى. بوتانيكالىق باقتا العاش رەت ول 1989 جىلى ەگىلگەن بولاتىن.