تەستىلەۋ 10 اقپانعا دەيىن وتكىزىلەدى.
وعان قاتىسۋعا 125 مىڭعا جۋىق ءوتىنىش ءتۇستى، دەپ حابارلايدى Almaty-akshamy.kz.
وتىنىشتەردى قابىلداۋ عىلىم جانە جوعارى ءبىلىم مينيسترلىگى ۇلتتىق تەستىلەۋ ورتالىعىنىڭ app.testcenter.kz سايتىندا 20 جەلتوقساننان 6 قاڭتارعا دەيىن جۇرگىزىلدى.
قاڭتارداعى ۇبت-عا جوعارى وقۋ ورىندارىنا شارتتى تۇردە قابىلدانعان ستۋدەنتتەر، شىعارماشىلىق دايىندىقتى تالاپ ەتەتىن بببت (ءبىلىم بەرۋ باعدارلامالار توبى)-دان باسقا ءبىلىم بەرۋ باعدارلامالارى توبىنا اۋىسۋعا نيەت بىلدىرگەن جوو ءبىلىم الۋشىلارى، اقىلى نەگىزدە «پەداگوگيكالىق عىلىمدار» ءبىلىم بەرۋ سالاسىنا اۋىسۋعا نيەت بىلدىرۋشىلەر، سونداي-اق قالاۋى بويىنشا جوو اقىلى نەگىزدە وقۋعا قابىلدانعىسى كەلەتىن مەكتەپ تۇلەكتەرى قاتىسادى.
تىركەلۋ كەزىندە تەست تاپسىرۋشىلار ەمتيحان ورنىن، كۇنىن جانە ۋاقىتىن وزدەرى تاڭدايدى. ايتا كەتۋ كەرەك، 2023 جىلعى ۇبت-دا تەستىلەۋ فورماتى وزگەرىسسىز قالدى. قازاقستان تاريحى بويىنشا تەستىلەۋگە قاتىسۋشىلار 20 تاپسىرمانى، وقۋ ساۋاتتىلىعى – 15، ماتەماتيكالىق ساۋاتتىلىق – 15 جانە ەكى بەيىندىك ءپان بويىنشا 35 تاپسىرمانى ورىندايدى. بارلىعى – 120 سۇراق. ەڭ جوعارى بالل – 140. تەستىلەۋدىڭ جالپى ۋاقىتى – 4 ساعات (240 مينۋت). سونداي-اق، ەرەكشە ءبىلىم بەرۋ قاجەتتىلىكتەرى بار بالالار ءۇشىن قوسىمشا 40 مينۋتتىق ۋاقىت ساقتالادى.
سونىمەن قاتار ديستراكتورلار سانى ازايدى (جاۋاپ نۇسقالارى). ءبىر دۇرىس جاۋابى بار تەست تاپسىرمالارىندا نۇسقالار سانى بەستەن تورتكە دەيىن، ءبىر نەمەسە بىرنەشە دۇرىس جاۋاپتارى بار تەست تاپسىرمالارىندا (ءۇش دۇرىس جاۋاپتان كوپ ەمەس) سەگىزدەن التىعا دەيىن ازايتىلدى.
قاڭتارداعى ۇبت-دان باستاپ «ينفورماتيكا مۇعالىمدەرىن دايارلاۋ»، «اقپاراتتىق تەحنولوگيالار»، «اقپاراتتىق قاۋىپسىزدىك» ءبىلىم بەرۋ باعدارلامالارىنىڭ توپتارىنا تۇسۋگە نيەت بىلدىرۋشىلەر ۇبت-نى «ماتەماتيكا-ينفورماتيكا» كومبيناسياسى بويىنشا تاپسىرادى.
«بۇگىن 2023 جىلعى العاشقى ۇبت باستالدى. ءبىز تەستىلەۋ كەزىندە عانا ەمەس، وعان دايىندىق بارىسىندا دا جاعداي جاساۋدى جالعاستىرامىز. مىسالى، 11 ءبىلىم بەرۋ ورتالىعى تالاپكەرلەرگە تەگىن ونلاين ساباقتار وتكىزەدى. وقۋ جىلىنىڭ باسىندا ۇتو سايتىندا «قازاقستان تاريحى» جانە «دۇنيەجۇزى تاريحى» بويىنشا 100 داتا، «قازاق ادەبيەتى» جانە «ورىس ادەبيەتى» بويىنشا ادەبيەتتەر ءتىزىمى، «ينفورماتيكادان» تەرميندەر ءتىزىمى ورنالاستىرىلدى. سونداي-اق ۇبت سۇراقتارى مەن تەست جوسپارى قۇراستىرىلعان وقۋلىقتاردىڭ ءتىزىمى جاريالاندى. ياعني تالاپكەرلەردە تەستىلەۋدى ءساتتى تاپسىرۋ ءۇشىن بارلىق مۇمكىندىك بار»، – دەپ اتاپ ءوتتى ق ر عبجم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
تەستىلەۋ كەزىندە كالكۋلياتور، مەندەلەيەۆ جانە تۇزدار ەرىگىشتىگى كەستەلەرى بارلىق تالاپكەر ءۇشىن كومپيۋتەر ەكراندارىندا قولجەتىمدى بولادى. سونداي-اق ۇبت قاتىسۋشىلارىنا وزدەرىمەن قالام، سۋ جانە شوكولاد الىپ كەلۋگە رۇقسات ەتىلەدى.