الماتىدا كوشەلەردەگى كوكتايعاقتىڭ الدىن الۋعا ارنالعان جاڭا جۇك كولىكتەرى ساتىپ الىندى.
الماتىدا بيۋدجەت قاراجاتى ەسەبىنەن «الماتى تازالىق» مكك قاراماعىنا كوشەدەگى كوكتايعاقتىڭ الدىن الۋ ءۇشىن كاماز 65116-6010-48 اۆتوموبيلىنە ورناتىلعان سۇيىقتىق شاشاتىن اسپالى جابدىعى بار ءۇش ارالاس جول ماشيناسى ساتىپ الىندى.
جاڭا كولىكتەر الماتىنىڭ المالى، بوستاندىق، مەدەۋ اۋداندارىندا كوشە تازالىعىمەن اينالىسادى. «الماتى تازالىق» مكك وكىلدەرى جاڭا تەحنيكانىڭ كوكتايعاقپەن كۇرەسۋدە پايداسى كوپ ەكەنىن ايتادى.
- بۇل تەحنيكانىڭ ەرەكشەلىگى – سۇيىق رەاگەنت قولدانىلادى. ياعني، كوشەگە سەبەتىن سۇيىقتىقتىڭ 24%-ى تۇز ەرىتىندىسى، قالعان بولىگى سۋدان تۇرادى. اتالمىش كولىكتەر قاردىڭ الدىندا، قار جاۋماي تۇرىپ كوشەلەرگە ارنايى سۇيىقتىقتى سەۋىپ شىعادى. ول جولداردا مۇز قاتپاۋى ءۇشىن جاسالادى. سۇيىقتىق شاشاتىن اسپالى جابدىعى كولىكتىڭ ارتىندا ورناتىلعان. ول 12 مەترگە دەيىن رەاگەنت شاشا الادى. جالپى، سۇيىقتىقتىڭ كولەمى 30 شاقىرىمعا دەيىن جەتەدى. سونداي-اق، ايتىلعان تەحنيكا جاز كەزىندە دە كوشە تازالىعى ءۇشىن جۇمىس ىستەي الادى، وعان بولەك ارنايى جابدىعى بار. ءقازىر بۇل كولىكتەردىڭ تيىمدىلىگى ءىس جۇزىندە تاعى ءبىر رەت تەكسەرىلەدى. ەگەر جاقسى ناتيجە كورسەتەتىن بولسا، الداعى ۋاقىتتا مۇنداي كولىكتەردىڭ سانى كوبەيەدى دەپ ۇمىتتەنەمىز»، – دەدى «الماتى تازالىق» مكك بوستاندىق اۋدانى بويىنشا ءبولىم باسشىسىنىڭ ورىنباسارى ەسىمحانوۆ ەرسىن جۇماباي ۇلى.
«الماتى تازالىق» مكك وكىلى اتالمىش تەحنيكانىڭ قورشاعان ورتاعا زيانى جوق ەكەنىن دە حابارلادى.
- تەحنيكانىڭ قورشاعان ورتاعا زيانى جوق. سۇيىقتىق سەبىلگەن سوڭ، ەشقانداي قوقىس قالمايدى. بۇرىن ءبىز تۇزبەن ارالاسقان قۇم شاشاتىنبىز. ول كەيىن قالا جولدارىندا بالشىققا اينالىپ، قالا تۇرعىندارىنا قولايسىزدىق تۋدىراتىن. سۋ مەن تۇز ارالاسقاندىقتان، رەاگەنتتە ەشقانداي قالدىق بولمايدى، سۋ اعىپ كەتەدى. كولىكتى باسقارىپ، تازالىق جۇمىستارىن جۇرگىزۋگە ءبىر عانا جۇرگىزۋشى جەتكىلىكتى، – دەدى ول.