كومپانيا ماماندارى ىزدەۋ جۇيەسىندە جاساندى ينتەللەكتىنىڭ بىرنەشە فۋنكسياسىن ەنگىزدى.
ول ىزدەۋشىلەرگە قاجەتتى اقپاراتتى اۋديو جانە بەينەجازبا ارقىلى تابۋعا مۇمكىندىك بەرەدى. جاڭارتىلعان جۇيەنىڭ ارتىقشىلىعى مەن كەمشىلىگى جايلى ايتساق. Google ىزدەۋ جۇيەسىندە وزگەرىس ەنگىزبەس بۇرىن جاساندى ينتەللەكتىنىڭ شولۋلارىن سىناپ كوردى. ەندى جاڭارتىلعان نۇسقانى جىل سوڭىنا دەيىن 1 ملرد-تان استام پايدالانۋشى قولدانا الادى، دەپ حابارلايدى Almaty-akshamy.kz 24.kz-كە سىلتەمە جاساپ.
ونىڭ ارتىقشىلىعى سول ماعلۇمات ىزدەۋشىلەر اقپاراتتى بۇرىنعىداي جازباشا ەمەس، داۋىس، بەينە ارقىلى جىلدام تابا الادى.
سۋندار پيچاي، Google باس ديرەكتورى:
ادامدار ىزدەۋ جۇيەسىنە ۇزىننان ۇزاق سۇراق قويىپ، فوتوسۋرەتتەرىن سالسا دا، Google قاجەتتى ءارى ەڭ ساپالى اقپاراتتى بىردەن تاۋىپ بەرەدى. جاڭارتىلعان جۇيە وسى اپتادا اقش-تا تولىق ىسكە قوسىلادى. جاقىن ارادا باسقا ەلدەردە دە ەنگىزىلەدى.
جۇيەدەگى وزگەرىستىڭ ءتيىمسىز تۇسى دا بار. جاساندى ينتەللەكت شولۋلارى اۆتورلىق قۇقىقپەن قورعالعان ماتەريالداردى زاڭسىز پايدالانۋى مۇمكىن. سونداي-اق ۆەب-سايتتاردىڭ قارالىم سانىن ازايتىپ، جارناما تابىسىن تومەندەتىپ جىبەرۋى مۇمكىن دەگەن كۇدىك تە بار.
دجەيمس مانياكا، Google تەحنولوگيا، قوعام جانە زەرتتەۋ جونىندەگى اعا ۆيسە-پرەزيدەنتى:
بۇل جۇيە ادامدارعا كۇندەلىكتى مىندەتتەرىنەن شىعارماشىلىق باستامالارىنا دەيىن كومەكتەسە الادى. ءبىراق كەز كەلگەن جاڭا تەحنولوگيا سياقتى ءالى دە جەتىلدىرۋدى قاجەت ەتەدى. تۋىنداعان ماسەلەلەردى دەر كەزىندە قاراستىرىپ، شەشىپ وتىرۋعا كۇش سالامىز. ءوز تاجىريبەمىزدەن ساباق الىپ، قوعام ءۇشىن بارىنشا پايدامىزدى تيگىزۋگە تىرىسامىز.
بىلتىر Google 175 ملرد دوللار كولەمىندە تابىس تاۋىپ، كىرىس كوزىن ۇلعايتتى. ەگەر ىزدەۋ جۇيەسى ۆەب سايتتاردىڭ جارناما تيىمدىلىگىنە نۇقسان كەلتىرسە، تاپقان تابىسىنان ايىرىلىپ قالۋى مۇمكىن. ءبىراق كومپانيا باسشىلىعى الاڭداۋعا ەش نەگىز جوق دەيدى.
سۋندار پيچاي، Google باس ديرەكتورى:
مۇنىڭ ءبارى جاساندى ينتەللەكتىنى كوپشىلىككە پايدالى ەتۋ ءۇشىن قابىلدانعان باتىل شەشىم. كومپانيا ءۇشىن ماڭىزدى پروگرەسس دەر ەدىم.
Google نەگىزى قالانعالى كەيىنگى 34 جىلدا مۇنداي قادامعا العاش بارىپ تۇر. سوندىقتان كومپانيا باسشىلىعىنىڭ جاڭارتىلعان جۇيەدەن ءۇمىتى زور. ال ساراپشىلار تەحنولوگيالىق الپاۋىتتىڭ باستاماسىنىڭ وزگە ۆەب سايتتارعا اسەرى قالاي بولاتىنىن ۋاقىت كورسەتەدى دەپ وتىر.