بۇل تۋرالى استانادا وتكەن كەلىسسوزدەردىڭ 20-راۋندى بارىسىندا بەلگىلى بولدى، دەپ حابارلايدى Almaty-akshamy.kz.
Ulysmedia.kz اقپاراتىنا سۇيەنسەك، كەلىسسوز قورىتىندىسىنا وراي كەپىلگەر ەلدەردىڭ بىرلەسكەن مالىمدەمەسىن ق ر سىرتقى ىستەر ءمينيسترىنىڭ ورىنباسارى قانات تۋمىش جاريا ەتتى.
«سيريانىڭ بىرتىندەپ وقشاۋلانۋ ايماعىنان شىعۋى استانا پروسەسىنىڭ ءوز مىندەتىن ابىرويمەن اتقارعانىنىڭ بەلگىسى دەپ تانۋعا بولادى. سيريانىڭ اراب ەلدەرى قاتارىنا ورالىپ كەلە جاتقانىن ەسكەرە وتىرىپ، استانا پروسەسى اياسىندا سيريا بويىنشا 20-شى وتىرىستى رەسمي سوڭعى دەپ جاريالاۋدى ۇسىنامىز»، - دەپ مالىمدەمە جاسادى سىرتقى ىستەر ءمينيسترىنىڭ ورىنباسارى قانات تۋمىش.
ايتا كەتەيىك، ەلوردادا 20-21 ماۋسىم ارالىعىندا سيريا بويىنشا 20-شى حالىقارالىق كەزدەسۋ ءوتتى. وعان كەپىلگەر ەلدەردىڭ – رەسەي، تۇركيا جانە يراننىڭ دەلەگاتتارى مەن سيريا ۇكىمەتى جانە وپپوزيسياسىنىڭ وكىلدەرى، سونداي-اق باقىلاۋشىلار قاتىستى.
كۇن تارتىبىندە سيريا توڭىرەگىندەگى وڭىرلىك احۋالدى وزگەرتۋ، تەرروريزمگە قارسى كۇرەس، سەنىم شارالارى، ونىڭ ىشىندە كەپىلگە الىنعانداردى بوساتۋ جانە حابار-وشارسىز كەتكەندەردى ىزدەۋ ماسەلەلەرى تالقىلاندى.
استانا الاڭى سيرياداعى قارسىلاس تاراپتار اراسىنداعى قاقتىعىستاردى توقتاتۋ بويىنشا كەلىسسوزدەر جۇرگىزۋ ءۇشىن ۇسىنىلعان. سيريالىق رەتتەۋ بويىنشا حالىقارالىق كەزدەسۋلەر ەلوردادا 2017 جىلدان بەرى وتكىزىلىپ كەلەدى.