2026 جىلعا قاراي «قورعاس» بازاسىندا زاماناۋي ازىق-تۇلىك حابىن قۇرۋ جوسپارلانعان. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى اlmaty-akshamy.kz.
«2026 جىلعا قاراي «قورعاس» بازاسىندا ازىق-تۇلىكتى ساقتاۋعا جانە تاراتۋعا باعىتتالعان زاماناۋي ازىق-تۇلىك حابىن قۇرۋ جوسپارلانىپ وتىر. ازىق-تۇلىك حابىن قۇرۋ — مەملەكەتتىك دەڭگەيدەگى مىندەت. ونىڭ شەشىمى حالىقارالىق تاۋار الماسۋعا سەرپىن بەرۋگە، اگرووندىرىستى ىنتالاندىرۋعا جانە وڭىرلىك دەڭگەيدەگى ارالاس ينفراقۇرىلىمدى (قويمالار، ساقتاۋ ورىندارى، كەپتىرگىشتەر، جەرگىلىكتى قايتا وڭدەۋ قۋاتتارى) قالىپتاستىرۋعا مۇمكىندىك بەرەدى»، - دەپ اتاپ وتەدى ۇكىمەت باسشىسى جاۋابىندا.
ونىڭ اتاپ وتۋىنشە، اتالعان باستامانى ىسكە اسىرۋ ءۇشىن «اتامەكەن» ۇلتتىق كاسىپكەرلەر پالاتاسىمەن جانە قازاقستاننىڭ ساۋدا كاسىپورىندارى قاۋىمداستىعىمەن بىرلەسىپ، ساۋدا-لوگيستيكالىق حاب ارقىلى ءىرى كوتەرمە ساۋدا مۇمكىندىگىن زاڭنامالىق بەكىتۋ جۇمىسى جۇرگىزىلىپ جاتىر.
بۇل رەتتە ساۋدا سالاسىنداعى زاڭنامانى وزگەرتۋدىڭ مىناداي 2 ءتاسىلى قاراستىرىلىپ جاتىر:
- «ءىرى كوتەرمە جانە شاعىن كوتەرمە ساۋدا» ۇعىمدارىن ەنگىزۋ جانە ساۋدا-لوگيستيكالىق حاب پەن كوتەرمە-تاراتۋ ورتالىقتارى ارقىلى ءىرى كوتەرمە ساۋدانى قايتا باعدارلاۋ؛
- كوتەرمە ساۋدانىڭ ساۋدا-لوگيستيكالىق حاب جانە كوتەرمە-ساۋدا ورتالىقتارى ارقىلى تولىق اۋىسۋى.
«وسى جىلدىڭ 11 قازاندا ساۋدا جانە ينتەگراسيا مينيسترلىگى «اتامەكەن» ۇكپ الاڭىندا وسى تاسىلدەردى تالقىلاۋ جۇرگىزدى. ناتيجەلەرى بويىنشا بارلىق ايتىلعان ۇستانىمداردى ەسكەرە وتىرىپ، «اتامەكەن» ۇكپ شوعىرلاندىرىلعان ۇستانىمىن دايىنداۋ تۋرالى شەشىم قابىلداندى»، - دەدى ءاليحان سمايىلوۆ.