برازيلياداعى سۋردليمپيادا ويىندارىنا سپورتشىلاردىڭ تولىق ءتىزىمىن بەرمەگەن سۋردليمپيادا كوميتەتى داۋعا قالدى

ەندى مادەنيەت مينيسترلىگى ۇلتتىق سۋردليمپيادا كوميتەتىن سوتقا بەرمەك

سەبەبى، ولار برازيليادا ءوتىپ جاتقان سۋردليمپيادا ويىندارىنا اپاراتىن سپورتشىلار ءتىزىمىن الدىن الا كەلىسپەگەن. جالپى، جارىسقا 29 سپورتشى قاتىسىپ جاتىر، دەپ حابارلايدى Almaty-akshamy.kz.

داۋدىڭ باسى ەركەبۇلان قانافين جەڭىپ العان التىن مەدالدان باستالدى. سۋردليمپيادا كوميتەتى قازاقستان زاڭناماسىنا قاراماستان، ءوز تاراپىنان ءبىرقاتار سپورتشىلاردى، ونىڭ ىشىندە ەركەبۇلان ءقانافيندى جارىسقا اپارعان. ءبىراق برازيلياداعى ساراپتاما ونىڭ ەستۋ قابىلەتىندە كىنارات جوق ەكەنىن انىقتاعان.

ول بۇرىن-سوڭدى ەستۋ قابىلەتى بۇزىلعان سپورتشىلار اراسىنداعى رەسمي جارىستارعا قاتىسپاعان. ۇلتتىق قۇراما كومانداسىنىڭ مۇشەسى ەمەس جانە دەنە مۇمكىندىكتەرى شەكتەۋلى جاندارعا ارنالعان سپورت ۇيىمدارىندا تىركەلمەگەن. مينيسترلىكتە اۋديوگرامما ناتيجەلەرى جانە جالپى سپورتشىنىڭ دەنساۋلىق جاعدايى تۋرالى اقپارات جوق. وسىعان قاراماستان، ۇلتتىق سۋردليمپيادا كوميتەتى سپورتشىنى ءوز ەسەبىنەن جارىسقا جىبەرىپ، قازاقستاننىڭ بەدەلىنە الەمدىك سپورت قوعامداستىعىنىڭ الدىندا نۇقسان كەلتىردى، - دەيدى مينيسترلىك وكىلدەرى.