ارنايى قاۋلى قابىلداندى.
ورتالىق سايلاۋ كوميسسياسى 5 ماۋسىمدا وتەتىن رەسپۋبليكالىق رەفەرەندۋم كوميسسيالارىنىڭ قىزمەتى تۋرالى قاۋلى قابىلدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ورتالىق رەفەرەندۋم كوميسسياسى ءتوراعاسىنىڭ ورىنباسارى كونستانتين پەتروۆ رەسپۋبليكالىق رەفەرەندۋمعا دايىندىق پەن ونى وتكىزۋ ءتارتىبىن 1995 جىلعى 2 قاراشاداعى «رەسپۋبليكالىق رەفەرەندۋم تۋرالى» كونستيتۋسيالىق زاڭ ايقىندايتىنىن اتاپ ءوتتى.
كونستيتۋسيالىق زاڭنىڭ 20-بابىنا سايكەس، رەفەرەندۋمعا دايىندىق پەن ونى وتكىزۋدى ورتالىق رەفەرەندۋم كوميسسياسىنىڭ قىزمەتىن اتقاراتىن ق ر ورتالىق سايلاۋ كوميسسياسى جانە اۋماقتىق رەفەرەندۋم كوميسسيالارىنىڭ قىزمەتىن اتقاراتىن اۋماقتىق سايلاۋ كوميسسيالارى جانە ۋچاسكەلىك رەفەرەندۋم كوميسسيالارىنىڭ قىزمەتىن اتقاراتىن ۋچاسكەلىك سايلاۋ كوميسسيالارى جۇرگىزەدى.
وتىرىستا رەسپۋبليكالىق رەفەرەندۋمدى دايىنداۋ مەن وتكىزۋ جونىندەگى نەگىزگى ءىس-شارالاردىڭ كۇنتىزبەلىك جوسپارى جوباسى شىعارىلدى.
وسىلايشا اۋماقتىق جانە ۋچاسكەلىك رەفەرەندۋم كوميسسيالارىنىڭ قۇرامى، كوميسسيالاردىڭ ورنالاسقان جەرى مەن جۇمىس ۋاقىتى تۋرالى مالىمەتتەر بۇقارالىق اقپارات قۇرالدارىندا – 2022 جىلعى 15 مامىردان كەشىكتىرىلمەي جاريالانۋعا ءتيىس.
رەفەرەندۋم ۋچاسكەلەرىنىڭ اۋماعى تۋرالى حابارلامالار دا وسى ۋاقىتتا باق-تا جاريالانۋى كەرەك.
«ۇگىتتەۋ جۇمىستارى رەفەرەندۋم تاعايىندالعاننان ساتتە باستالىپ، داۋىس بەرۋدىڭ اياقتالۋىنا ءبىر كۇن قالعاندا، ياعني 2022 جىلى 4 ماۋسىمدا ساعات 00-00-دە اياقتالادى. رەسپۋبليكالىق رەفەرەندۋمعا قاتىسۋعا قۇقىعى بار ازاماتتاردىڭ تىزىمىنە ءاربىر ۋچاسكە بويىنشا اكىم قول قويادى جانە حاتتاما بويىنشا بۇل ءتىزىم 2022 جىلعى 15 مامىردان كەشىكتىرمەي ۇسىنىلادى»، - دەدى كونستانتين پەتروۆ ورتالىق سايلاۋ كوميسسياسىندا وتكەن وتىرىستا.
ۋچاسكەلىك رەفەرەندۋم كوميسسياسى داۋىس بەرۋ ۋاقىتى مەن مەكەنجايى تۋرالى ازاماتتاردى 2022 جىلعى 25 مامىردان كەشىكتىرمەي حاباردار ەتەدى.
ەگەر داۋىس بەرۋدىڭ وزگە ۋاقىتى بەلگىلەنبەسە، ۋچاسكەلىك كوميسسيالار داۋىس بەرۋ كۇنى جەرگىلىكتى ۋاقىت بويىنشا ساعات 07:00-دەن 20:00-گە دەيىن رەفەرەندۋم وتكىزەدى.
داۋىس بەرۋ قورىتىندىسى ورتالىق رەفەرەندۋم كوميسسياسىنىڭ وتىرىسىندا شىعارىلادى جانە حاتتامامەن راسىمدەلەدى.
وعان ورتالىق رەفەرەندۋم كوميسسياسىنىڭ ءتوراعاسى، ءتوراعانىڭ ورىنباسارى، حاتشىسى مەن مۇشەلەرى قول قويادى جانە قاۋلىمەن بەكىتىلەدى.