«بوزوقتان بوتايعا دەيىن» سالت اتتىلار ەكسپەديسياسى جولعا شىقتى

بابالار ىزىمەن ەجەلگى قونىستارعا ساياحات.

اتقا قونعان بەلسەندى توپ سارىارقا تورىندەگى 1250 جىلدىق تاريحى بار كونە بوزوق قالاشىعىنان ەكسپەديسياعا اتتاندى. سايگۇلىگىن باپتاپ، تۇلپارىن تاقىمعا باسقان 15 ازامات تەرىسكەيدەگى ەجەلگى بوتاي قونىسىنا بەت الدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

ماقسات – داۋىرلەردى توعىستىرعان توعىز جولدىڭ تورابىنداعى ۇلى جىبەك جولىنىڭ تارماقتارىن جاڭعىرتۋ، ءتول مادەنيەت پەن ۇلتتىق ءداستۇردى ناسيحاتتاۋ.     

"ءار ايالدامادا تەك قانا اتپەن  ءجۇرۋ ەمەس، سول جەردىڭ مادەنيەتىن تاريحىن بۇگىنگى جاستارعا ونەگە ەتۋ. نەگىزگى ماقساتىمىز – كەشەگى ءجۇرىپ وتكەن باتىرلاردىڭ ءىزىن جاڭعىرتۋ، اتقا ءمىنۋ مادەنيەتىن، ءداستۇرىن دارىپتەۋ، سونىمەن قاتار قازاقستان رەسپۋبليكاسى رامىزدەرىنىڭ 30 جىلدىعىنىڭ اياسىندا، سونىمەن بىرگە بەلگىلى ارحەولوگ ۆيكتور زايبەرتتىڭ ەڭبەگىنە ارنالادى"، - دەيدى ەكسپەديسيا مۇشەسى ديدار ورالبەك ۇلى.

ساپار بارىسىندا سالت اتتىلار اقمولا جانە سولتۇستىك قازاقستان وڭىرلەرىنىڭ كيەلى مەكەندەرىنە تابان تىرەيدى. جول-جونەكەي دومبىرالى وزەنى، يمانتاۋ، ابىلايحان قورىمى، اعىنتاي-قاراساي باتىرلار كەشەنى سىندى ءبىرقاتار قاسيەتتى جەرگە ات تۇياعىن تيگىزبەك.

تامىرى تەرەڭ تارتقان تاريحي-مادەني ورىنداردى ءبىر اپتانىڭ ىشىندە ارالاپ شىعۋ جوسپارلانعان. ەكسپەديسيا مۇشەلەرى كۇنىنە 60-70 شاقىرىمدى ءجۇرىپ ءوتىپ، باس-اياعى 450 شاقىرىمدى باعىندىرۋدى كوزدەپ وتىر.