بۇل - ءتۇرلى قايىرىمدىلىق ءىس-شارالار مەن ەكو-اكسيالار.
قاڭتار وقيعاسى كەزىندە ۆولونتەرلەر قيىن جاعدايدا قالعان مىڭنان استام تۇرعىنعا كومەكتەستى. بۇل تۋرالى «QAMQOR CHARITY» قوعامدىق قورىنىڭ ءتورايىمى باعدات اناربايەۆا وكق الاڭىندا وتكەن بريفينگتە ايتتى، دەپ حابارلايدى Almaty-akshamy.kz Baq.kz سىلتەمە جاساپ.
«ماسەلەن، 2022 جىلدىڭ قاڭتارىندا ەلىمىزدەگى توتەنشە جاعداي رەجيمى كەزىندە قيىن جاعدايعا تاپ بولعان ادامدارعا، مەكەمەلەر مەن كاسىپورىندارعا كومەك كورسەتۋ جۇمىستارى ۇيىمداستىرىلدى. بارلىعى 1000-نان استام الماتىلىق وتباسىنا كومەك كورسەتىلدى. سونداي-اق قايىرىمدىلىق شارالارىنىڭ باسىم بولىگى مۇسىلمانداردىڭ قاسيەتتى رامازان ايىندا وتكىزىلدى. ەرىكتىلەر كوپ بالالى جانە تۇرمىسى تومەن وتباسىلارعا اۋىزاشار بەرىپ، قالا كوشەلەرىندە قۇرما مەن سۋ تاراتۋعا اتسالىستى»، - دەدى باعدات اناربايەۆا.
بۇل رەتتە قوعامدىق قور ءتورايىمى الماتىلىق ەرىكتىلەر ءوز ميسسياسىن ءبىر رەتتىك اكسيا ەمەس، ءومىر سالتىنا اينالدىرعانىنا سەنىمدى.
«ءبىزدىڭ قالامىزدا اتا-انا قامقورلىعىنسىز قالعان بالالارعا كاسىپتىك باعدار بەرۋ جانە قىسقا مەرزىمدى كاسىپتەرگە وقىتۋعا باعىتتالعان «الەۋمەتتىك شەبەرحانا» اۆتورلىق جوباسى جۇمىس ىستەيدى. وندا ەرىكتىلەرگە ەرەكشە ءرول بەرىلەدى. سونىمەن قاتار، ءبىز Ulagat جوباسىنا قاتىسىپ، جالعىزباستى ارداگەرلەر مەن زەينەتكەرلەرگە قامقورلىق جاسايمىز»، - دەدى ەرىكتىلەردىڭ كوشباسشىسى.
مەرەكە كۇندەرى ەرىكتىلەر ۇلكەن جۇمىس اتقاردى. بۇل - ءتۇرلى قايىرىمدىلىق ءىس-شارالار مەن ەكو-اكسيالار.
بريفينگتىڭ تاعى ءبىر قاتىسۋشىسى - «قازاقستان ەرىكتىلەرى ليگاسى» قق ءتوراعاسى نۇرسۇلتان بەكقايىروۆ ەرىكتىلەر وزدەرىنىڭ ناقتى ىس-ارەكەتتەرىمەن قورشاعان الەمدى، ءوز ەلىن وزگەرتەتىنىن اتاپ ءوتتى.
«ءبىز جەتى باعىت بويىنشا جۇمىس جاسايمىز. ولار - BILIM، SABAQTASTYQ، QAMQOR، TAZA ALEM، ءۇمىت، ASYL MURA، AYALA. رەسپۋبليكالىق «يگى ىستەر مارافونى»، «ارداگەرلەردى ارداقتايىق»، «ءشاي ىشەيىك»، «جارقىن جۇلدىز» اكسيالارىن ۇيىمداستىرۋعا قاتىسىپ كەلەمىز. بيىلعى جىلدىڭ باسىنان بەرى ءفرونت-وفيستىڭ قولداۋىمەن 80-گە جۋىق جوبا ۇيىمداستىرىلىپ، جۇزەگە اسىرىلدى»، - دەدى نۇرسۇلتان بەكقايىروۆ.
ونىڭ ايتۋىنشا، قالانىڭ بارلىق جوعارى وقۋ ورىندارىندا «قازاقستان ۆولونتەرلار ليگاسى» قوعامدىق قورىنىڭ فيليالدارىن اشۋ جوسپارلانۋدا. بۇگىندە بۇل ۇيىمنىڭ فيليالدارى 23 جوعارى وقۋ ورنىندا جۇمىس ىستەيدى.
«مەن ەرىكتىلەر تەك جاستار قاتارىنان بولادى دەگەن ستەرەوتيپتەردىڭ ءبىرىن جوققا شىعارامىن. ءبىز «كۇمىس ۆولونتەر» تۇجىرىمداماسىن ازىرلەۋدەمىز. بۇل - بەلسەندى ازاماتتىق ۇستانىمى بار ەڭبەكتەنۋشى ادامدار»، - دەدى نۇرسۇلتان بەكقايىروۆ.
ءسوز سوڭىندا سپيكەرلەر ەرىكتى بولۋ قيىن ەمەس، كەز كەلگەن فرونت-وفيسكە حابارلاسىپ، وقۋدان ءوتىپ، كوماندانىڭ ءبىر مۇشەسى بولۋ جەتكىلىكتى ەكەنىن ايتتى. وسىنداي ازاماتتاردىڭ باستامالارى مەدالدارمەن، العىس حاتتارمەن ماراپاتتالادى.