حالىقتىڭ قوزعالۋى قيىن توپتارىنا ارنالعان جەراستى جانە جەرۇستى جاياۋ جۇرگىنشىلەر وتكەلدەرىنە ليفت پەن كوتەرگىشتى ورناتۋ بويىنشا ەكى جوبا اياقتالۋ ساتىسىندا.
الماتى قالاسى بوستاندىق اۋدانىنىڭ اكىمى التاي راحىمبەتوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا قالا تۇرعىندارىنىڭ قوعامدىق كەڭىستىكتى جاقسارتۋعا، كوركەيتۋگە، مەگاپوليستى دامىتۋعا بەلسەندى تارتىلعانى تۋرالى ايتىپ بەردى، دەپ حابارلايدى Almaty-akshamy.kz
«بوستاندىق اۋدانىنىڭ تۇرعىندارى «بيۋدجەتكە قاتىسۋ» جوبالارىن تاڭداۋعا جانە تالقىلاۋعا قىزىعۋشىلىقپەن قاتىسادى، ولاردىڭ ورنىنا دەمالىس پەن بوس ۋاقىت ءۇشىن زاماناۋي ينفراقۇرىلىم الادى. مىسالى، بيىل ءبىز 9 بالالار مەن سپورت الاڭدارىن جوندەپ، 13 قوعامدىق كەڭىستىكتى اباتتاندىردىق»، - دەدى التاي راحىمبەتوۆ.
2022 جىلى «بيۋدجەتكە قاتىسۋ» باعدارلاماسى بويىنشا 21 جوبانى ىسكە اسىرۋ جوسپارلانعان. بوستاندىق اۋدانىنىڭ تۇرعىندارى اباتتاندىرۋ بويىنشا نازار اۋدارۋدى قاجەت ەتەتىن ۋچاسكەلەردى تاڭداۋ مۇمكىندىگىنە يە بولدى.
سونىمەن قاتار، قالادا ساياباقتاردى، سكۆەرلەردى، ءبولۋ جولاقتارىن، قوعامدىق پايدالانۋ ورىندارىن، ۇلكەن الماتى جانە ەسەنتاي وزەندەرىنىڭ جاعالاۋلارىن، كولىك ايرىقتارىن جيناۋ جانە كۇتىپ ۇستاۋ، سونداي-اق ارىق جەلىلەرىن تازالاۋ جۇمىستارى جۇرگىزىلۋدە.
اۋداندا كوگالداندىرۋ جۇمىستارى قارقىندى جۇرگىزىلۋدە، بيىل 7 250 اعاش كوشەتتەرى مەن 2 220 بۇتالار وتىرعىزىلدى. كوكتەمدە 31 941 شارشى مەتر الاڭعا گۇلدەر وتىرعىزىلدى، ماگيسترالدى كوشەلەر بويىنداعى 319 گۇلزار رەتكە كەلتىرىلدى.
اۋدان قىزمەتتەرى قوقىس جاشىكتەرىن، ورىندىقتاردى، قوعامدىق كولىك ايالدامالارىن، كوشە بويىنداعى قورشاۋلار مەن جولايىرىقتاردى بوياۋ جۇمىستارىن اياقتادى. سونداي-اق، سۋبۇرقاق پەن مۇراجايدىڭ ىرگەلەس اۋماعىن جوندەۋ اياقتالدى. ءا. قاستەيەۆ اتىنداعى ساياباقتاعى فونتانعا كۇردەلى جوندەۋ جۇمىستارى جۇرگىزىلدى. ۇلكەن الماتى - ال-فارابيدەگى كوپىراستى كەڭىستىگى اۋماقتارىن اعىمداعى جوندەۋ اياقتالدى.