جايلى ورتا قۇرۋ بويىنشا جۇمىستار بارلىق جەردە جۇرگىزىلۋدە
اۋلالاردى اباتتاندىرۋدىڭ مىندەتتى ەلەمەنتتەرى بالالار ويىن الاڭى، تۇراق، جارىقتاندىرۋ، كوگالداندىرۋ، ورىندىقتار مەن قوقىس جاشىكتەرى بولدى. بۇل تۋرالى الماتى قالاسى بوستاندىق اۋدانىنىڭ اكىمى التاي راحىمبەتوۆ مالىمدەدى، دەپ حابارلايدى Almaty-akshamy.kz
وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ءسوز سويلەگەن ول بوستاندىق اۋدانىندا 135 پيك پەن پكسك قىزمەت كورسەتەتىن 1 866 كوپ پاتەرلى تۇرعىن ءۇي بار ەكەنىن ايتتى. الايدا، بىرتىندەپ تۇرعىندار باسقارۋدىڭ جاڭا فورمالارىنا كوشۋدە. 529 كوپ قاباتتى ءۇيدىڭ تۇرعىندارى 123 ميب جانە 290 ءجاي سەرىكتەستىك قۇردى.
«34 كوپ پاتەرلى ءۇيدىڭ تۇرعىندارى «نۇرلى جەر» باعدارلاماسىن پايدالانىپ، 85 ليفت جابدىعىن جاڭارتتى، 11 ءۇي بويىنشا شاتىردى، ينجەنەرلىك جەلىلەردى اۋىستىرۋ جانە قاسبەتتەردى سىرلاۋ بويىنشا جوندەۋ جۇمىستارى اياقتالدى، 7 ۇيدە جوندەۋ جۇمىستارى جۇرگىزىلۋدە»، - دەپ جالعاستىردى ءسوزىن التاي راحىمبەتوۆ.
سونىمەن قاتار، ينۆەستورلاردى تارتۋ ەسەبىنەن كوپ پاتەرلى تۇرعىن ۇيلەردىڭ 4 قاسبەتى بويالدى. سونداي-اق، 19 بالالار الاڭى اباتتاندىرىلدى، جىل سوڭىنا دەيىن تاعى ەكى الاڭ پايدالانۋعا بەرىلەدى دەپ جوسپارلانۋدا.
سونداي-اق، التاي راحىمبەتوۆ ينجەنەرلىك ينفراقۇرىلىمنىڭ جاڭارتىلعانى تۋرالى حابارلادى. مىسالى، تومەن قىسىمدى جەراستى گاز قۇبىرىنىڭ 27،1 شاقىرىمى قايتا جاڭعىرتىلدى، ەسكىرگەن ەلەكتر كابەل جەلىلەرىنىڭ 2،9 شاقىرىمى اۋىستىرىلدى.
اۋلالار مەن كوشەلەردى جارىقتاندىرۋعا كوپ كوڭىل بولىنەدى. بيىل 155 ۋچاسكەنى جارىقتاندىرۋ جوسپارلانعان، 140 كوشەنىڭ جۇمىستارى اياقتالدى. ءسوزىن قورىتىندىلاعان اۋدان اكىمى 16 كوشە مەن ۇزىندىعى 17 شاقىرىم بولاتىن جولايرىعىندا ورتاشا جوندەۋ جۇمىستارى اياقتالعانىن حابارلادى.