بوستاندىق اۋدانىندا 4077 وقۋشى ورنى تاپشى. اۋدان تۇرعىندارىمەن كەزدەسۋدە قالا اكىمى ەربولات دوسايەۆ بۇل ماسەلەنى شەشۋ ءۇشىن ساتبايەۆ كوشەسى، 101 مەكەنجايىندا 300 ورىندىق №65 مەكتەپكە قوسىمشا قۇرىلىس سالىنىپ جاتقانىن ايتتى، دەپ حابارلايدى Almaty-akshamy.kz.
جۇمىس 1 قىركۇيەككە دەيىن اياقتالادى. قىركۇيەك ايىنان باستاپ سويلەۋ قابىلەتى بۇزىلعان بالالارعا ارنالعان №9 مەكتەپ-ينتەرنات اشىلىپ، 120 ورىندىق قوسىمشا قۇرىلىسى اياقتالادى.
«بيزنەستىڭ الەۋمەتتىك جاۋاپكەرشىلىگى شەڭبەرىندە «رامس قازاقستان» قۇرىلىس كومپانياسى «رامس سيتي» كوپپاتەرلى تۇرعىن ءۇي كەشەنىنىڭ اۋماعىندا 1 100 ورىندىق مەكتەپتىڭ قۇرىلىسىن جۇرگىزۋدە. اياقتالۋى – 2024 جىلدىڭ تامىز ايى، سونىمەن قاتار، 240 ورىندىق 2 بالاباقشانىڭ قۇرىلىسىن باستاپ، 2024 جىلدىڭ تامىز ايىندا اياقتاۋ جوسپارلانعان. جىل باسىنان بەرى اۋداندا 657 بالانى قامتىعان 6 جەكە مەنشىك جانە 1 مەملەكەتتىك بالاباقشا اشىلدى»، - دەدى ەربولات دوسايەۆ.
ساتبايەۆ كوشەسى، 90 مەكەنجايىندا «كونكريت پروداكتس» ج ش س زاۋىتى كوشكەننەن كەيىن وسى جىلدىڭ قازان ايىندا «Hit Building» ج ش س 900 ورىندىق مەكتەپ قۇرىلىسىن باستايدى. تاپسىرۋ مەرزىمى شامامەن 2024 جىلدىڭ تامىزى. «جايلى مەكتەپ» ۇلتتىق جوباسى اياسىندا 3 مەكتەپ سالۋ جوسپارلانعان: ەگىزبايەۆ كوشەسى، 9 مەكەنجايىندا 2 500 ورىندىق، روزىباقييەۆ-ليەۆيتان كوشەلەرىنىڭ قيىلىسىندا 1 500 ورىندىق جانە روزىباقييەۆ – قوجابەكوۆ قيىلىسىندا 2 000 ورىندىق. بۇل جۇمىس كەلەسى جىلدىڭ سوڭىنا دەيىن اياقتالادى.