كارديولوگيا جانە ىشكى اۋرۋلار عزي-دا رۋمىنيادان كەلگەن جەتەكشى ينتەرۆەنسيالىق كارديولوگ جانە راديولوگ Marin Postu قاتىسۋىمەن روتاسيالىق كورونارلىق اتەرەكتوميا (روتابلاسيا) بويىنشا شەبەرلىك سىنىپ ءوتتى.
شەبەرلىك سىنىپقا الماتى قالاسى مەن ەلىمىزدىڭ وڭىرلەرىنىڭ رەنتگەنحيرۋرگتارى جينالدى، دەپ حابارلايدى Almaty-akshamy.kz
روتاسيالىق كورونارلىق اتەرەكتوميا – بۇل جوعارى جىلدامدىقتى گاۋھار بۇرىككىش اينالمالى بۇرعى ارقىلى كورونارلىق ارتەريانىڭ ستەنوزدى زاقىمدانۋىن جويۋدىڭ زاماناۋي ءادىسى. روتابلاتور اتەروسكلەروتيكالىق كالسيلەنگەن تۇيىنشەكتەرى بار ارتەريالاردىڭ وتكىزگىشتىگىن قالپىنا كەلتىرۋگە ارنالعان.
وپەراسيا كەزىندە دارىگەرلەر جۇرەكتىڭ «قاتايعان» تامىرلارىن بۇرعىلايدى، ولار قۇبىر ءتارىزدى كالسيلەنگەن اكپەن جابىلعان. روتابلاسياسىز ستەنتتى تولىعىمەن اشۋ، تامىردىڭ تولىق اشىلۋىن جانە قان اعىمىن قالپىنا كەلتىرۋ مۇمكىن ەمەس.
روتابلاسيا - قاتتى جانە كالسيلەنگەن اتەروسكلەروتيكالىق تۇيىنشەكتەردى ەمدەۋدىڭ ءتيىمدى ريەۆوليۋسيالىق ءادىسى. ءبىراق پروسەدۋرا كۇردەلى اسقىنۋلارعا تولى بولعاندىقتان، ونى ساراپتامالىق دەڭگەيدەگى كلينيكالاردا جوعارى بىلىكتى تاجىريبەلى دارىگەر جاساۋ كەرەك.
«شەبەرلىك سىنىپ اياسىندا 2 كۇن ىشىندە جۇرەكتىڭ يشەميالىق اۋرۋى، كورونارلىق ارتەريانىڭ سوزىلمالى وككليۋزياسى، كالسيلەنگەن زاقىمدانۋى بار 50-73 جاس ارالىعىنداعى پاسيەنتتەرگە بىرنەشە وپەراسيا جاسالادى»،-دەيدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.
«مەديسينا ءبىر ورىندا تۇرمايدى. ءبىز، دارىگەرلەر، كۇن سايىن دامىپ، زامان كوشىنە ىلەسۋىمىز كەرەك. سوندىقتان ءوز قىزمەتكەرلەرىمىزگە وسىنداي شارالاردى ۇنەمى ۇيىمداستىرىپ، جەتەكشى شەتەلدىك مەديسينالىق ورتالىقتارعا جىبەرىپ، ولارمەن بايلانىس ورناتىپ، وزىمىزگە شاقىرىپ تۇرامىز»، - دەيدى ول.
«بۇل ارنايى تەحنيكالار مەن ماتەريالداردى قولداناتىن وتە كۇردەلى وپەراسيا. بارلىق وپەراسيالار ءساتتى اياقتالدى. مەن مۇندا ۇيرەتۋشىمىن دەپ ايتا المايمىن، ءبىز تاجىريبە الماسۋدامىز. وسى سالادا مەن 10 جىل جۇمىس ىستەيمىن. جاڭاشىلدىق – ءبىز ەڭ زاماناۋي ماتەريالداردى پايدالاندىق. نەگىزىندە، مۇنداعى دارىگەرلەر مۇنى قالاي جاساۋ كەرەكتىگىن بىلەدى، ءبىراق بۇعان دەيىن ولاردى ءىس جۇزىندە قولدانباعان»، - دەيدى رۋمىنيالىق قوناق.
رەنتگەنەندوۆاسكۋليارلىق وپەربلوك مەڭگەرۋشىسى الەكسەي كولەسنيكوۆتىڭ ايتۋىنشا، روتابلاسيا كورونارلىق ارتەريانىڭ كالسيلەنگەن ستەنوزىمەن ناۋقاستاردى ەندوۆاسكۋليارلىق ەمدەۋدىڭ بالاما ءادىسى بولا الادى. بۇل پاسيەنت ءۇشىن بارلىق قاۋىپتەر مەن قولايسىزدىقتارعا تولى كولەمدى اشىق وپەراسيادان ساقتايدى.
تەرى ارقىلى كورونارلىق ينتەرۆەنسيالاردا روتاسيالىق اتەرەكتوميانى قولدانۋ سونىمەن قاتار اسقىنۋلاردىڭ دامۋ ءقاۋپىن ازايتۋعا، كورونارلىق ارتەريانىڭ كالسيلەنگەن ستەنوزىمەن ناۋقاستاردىڭ ءومىرىن ساقتاۋعا جانە ءومىر ءسۇرۋ ساپاسىن جاقسارتۋعا مۇمكىندىك بەرەدى، پاسيەنتتەردىڭ ەمدەۋگە جاتۋ ۇزاقتىعىن قىسقارتادى.
پاسيەنتتەر كلينيكادان سيمپتوماتيكالىق جاقسارۋمەن شىعارىلادى.
Marin Postu-20 جىلدان استام تاجىريبەسى بار ينتەرۆەنسيالىق كارديولوگ جانە راديولوگ. ول جىلىنا 1000-نان استام دياگنوستيكالىق انگيوگرافيانى جانە تەرى ارقىلى ارالاسۋدى، نەگىزىنەن كورونارلىق ارالاسۋلار (شامامەن 80%) جانە تامىرلى ارالاسۋدىڭ بارلىق تۇرلەرىن جاسايدى. ميوكارد ينفاركتىسىنە العاشقى تەرى ارقىلى كورونارلىق ارالاسۋدى جۇرگىزۋدە ۇلكەن تاجىريبەسى بار. پولشا، بوسنيا جانە گەرسەگوۆينا، ليۋكسەمبۋرگ جانە ت.ب. ەلدەردەگى ينتەرۆەنسيالىق كارديولوگيا جانە راديولوگيا بويىنشا بارلىق ماڭىزدى كونگرەستەر مەن كۋرستارعا قاتىسادى. ول رۋمىنيا كارديولوگيا قوعامىنىڭ ينتەرۆەنسيالىق كارديولوگيا بويىنشا جۇمىس توبىنىڭ پرەزيدەنتى.