قارجى مونيتورينگى اگەنتتىگى باسشىسىنىڭ ورىنباسارى جەڭىس ەلەمەسوۆ قايرات بورانبايەۆتىڭ مەملەكەتكە وتەگەن سوماسىن جاريالادى، دەپ حابارلايدى almaty-akshamy.kz
جەڭىس ەلەمەسوۆتىڭ ايتۋىنشا، قايرات بورانبايەۆ سوت تالقىلاۋى ناتيجەسىندە مەملەكەتكە 14،5 ملرد تەڭگە كولەمىندە زالال وتەدى. بۇدان باسقا، ول قوسىمشا 120 ملرد تەڭگەنى ءوز ەركىمەن وتەگەن. وسىلايشا، جالپى وتەلگەن سوما 134،5 ملرد تەڭگەنى قۇرايدى.
«جالپى، ول سوتتالعان نەگىزگى قىلمىستىق ءىس بويىنشا زالال 14،5 ملرد تەڭگە كولەمىندە وتەلدى. بۇدان باسقا، 120 ملرد تەڭگە كولەمىندە زالالدى ءوز ەركىمەن وتەدى. 120 ملرد تەڭگەنى 14،5 ملرد تەڭگەگە قوسساڭىز، 134،5 ملرد تەڭگە. مەن بۇگىنگى كۇنگە دەيىن وتەگەنىن ايتىپ وتىرمىن. قىلمىستىق ءىس ءالى توقتاتىلعان جوق، تەرگەلىپ جاتىر»، - دەدى ەلەمەسوۆ.
اكتيۆتەر مەن بۇلتارتپاۋ شارالارى
اكتيۆتەرگە بايلانىستى سۇراققا جاۋاپ بەرە وتىرىپ، ەلەمەسوۆ بارلىق اكتيۆتەردىڭ تىركەلگەنىن، ءبىراق ولاردىڭ ناقتى قۇنى تۋرالى اقپارات بەرە المايتىنىن ايتتى. سونىمەن قاتار، بورانبايەۆقا قاتىستى قانداي بۇلتارتپاۋ شارالارى قولدانىلعانى جانە نەگە ول بوستاندىقتا ەكەندىگى دە تالقىلاندى.
«بوستاندىق نەنى بىلدىرەدى؟ سوت شەشىمىمەن ول سوتتالدى. باس بوستاندىعىنان ايىرۋ جازاسى شەكتەۋمەن اۋىستىرىلدى. ەلەكتروندى بىلەزىك تاعىلعان جوق. ول ءقازىردىڭ وزىندە شەكتەۋلى. ونىڭ بيۋدجەت قاراجاتىن ۇرلاۋعا جانە سالىق تولەۋدەن جالتارۋ بويىنشا كۇدىكتى ىستەرى بار»، - دەدى ەلەمەسوۆ.
«قايرات» فۋتبول كلۋبى تۋرالى
«قايرات» فۋتبول كلۋبىنا قاتىستى ەلەمەسوۆ اگەنتتىكتىڭ قىلمىستىق ءىس جۇرگىزىپ جاتپاعانىن مالىمدەدى. وسىلايشا، بۇل كلۋبقا قاتىستى قىلمىستىق ءىس جوق ەكەنىن ناقتىلادى.
بۇل مالىمدەمە قارجى مونيتورينگى اگەنتتىگىنىڭ قايرات بورانبايەۆقا قاتىستى تەرگەۋ جۇمىستارىنىڭ ءالى دە جالعاسىپ جاتقانىن كورسەتەدى. ماسەلەنىڭ اياقتالۋى ۋاقىت ەنشىسىندە.
ەستەرىڭىزگە سالا كەتسەك بۇعان دەيىن قايرات بورانبايەۆ 30 ملرد تەڭگەنى مەملەكەتكە قايتارعان بولاتىن.