الاتاۋ اۋدانىندا بورالداي وزەنىنىڭ بويىنداعى جاسىل ايماقتى اباتتاندىرۋ جۇمىستارى جۇرگىزىلۋدە. مەردىگەرلىك ۇيىممەن جاسالعان كەلىسىم شارت بويىنشا قۇرىلىستىڭ اياقتالۋ مەرزىمى 2024 جىلعى ناۋرىزعا جوسپارلانعان.
مەردىگەر ۇيىمنىڭ وكىلى الماتى قالاسى اكىمىنىڭ ورىنباسارى الىشەر ءابدىقادىروۆقا جۇمىس ساپارى بارىسىندا ايتىپ وتكەندەي، بۇگىندە جەر جۇمىستارى اياقتالدى، 70%-عا نىعايتۋ جۇمىستارى ىسكە استى، ەكى توعان تازارتىلدى، فۋتبول مەن باسكەتبول الاڭدارى قورشالدى. سونداي-اق، مەردىگەر قۇرىلىس جۇمىستارى بارىسىندا جەرگىلىكتى تۇرعىندار 100-دەن استام كامازبەن قالدىرعان تۇرمىستىق قوقىس شىعارىلعانىن اتاپ ءوتتى.
جوبادا اسفالت جانە جابىندى توسەۋ، ۋرنالاردى، ورىندىقتاردى، مودۋلدىك سانيتارلىق-گيگيەنالىق توراپتاردى، سىرتقى جارىقتاندىرۋ جانە سۋارۋ جۇيەسىنىڭ تىرەكتەرىن، سۋ قويماسىنىڭ اينالاسىنا اعاش پيرستەردى ورناتۋ قاراستىرىلعان. بەلسەندى ايماقتا بالالار مەن سپورت الاڭدارىن سالۋ، تەننيس ۇستەلدەرىن ورناتۋ جوسپارلانۋدا.
جوبادا كوگالداندىرۋعا ەرەكشە نازار اۋدارىلاتىن بولادى. ميكروكليماتتى ساقتاۋ ءۇشىن ماماندار 1،5 مىڭنان استام اعاش (تەرەك، ۇيەڭكى، جەمىس) جانە 5 مىڭعا جۋىق گۇلدى وسىمدىكتەردى وتىرعىزۋدى جوسپارلاپ وتىر. لاندشافت ديزاينەرلەرى گۇلزارلاردى وتىرعىزۋعا دايىندالۋدا، بولەك ايماقتا الما اعاشتارىن وتىرعىزاتىن قازاق باۋ- باعى ايماعى بولادى، بولاشاقتا مۇندا ناۋرىز ايىندا حالىقتىق مەرەكەلەر وتكىزۋگە، جاپونياداعى ساكۋرا گۇلدەرىنە ۇقساس قىزعالداقتاردىڭ گۇلدەنۋىن كورۋگە بولادى.
سونىمەن قاتار، شاعىن سۋ قويماسىنىڭ اينالاسىندا لوتوس پەن سۋ لالاگۇلدەرىن وتىرعىزاتىن جاپون باقشاسىنىڭ قۇرىلىسى قاراستىرىلعان. كوگالداندىرۋ جۇمىستارى سۋارۋ جۇيەسىن ورناتقاننان كەيىن باستالادى، سۋ بورالداي وزەنىنەن الىنادى جانە قوسىمشا سكۆاجينا بولادى.
بورالداي وزەنىنىڭ ارناسىن نىعايتۋ جوباسى سۋ تاسقىنى ماسەلەسىن شەشۋگە دە ىقپال ەتەدى، ويتكەنى وعان قالانىڭ جوعارعى بولىگىنەن ءۇش كانال مەن ەكى كوللەكتور تارتىلعان.
"بۇل - الاتاۋ اۋدانىنداعى العاشقى اباتتاندىرىلعان جاعالاۋ.ول جەرگىلىكتى تۇرعىندار ءۇشىن جاڭا سەرۋەندەۋ ورتالىعىنا اينالادى، ال بۇل شامامەن 30 مىڭ ادام – سايالى، كوكقاينار، وجەت. شاعىن اۋدان تۇرعىندارى. وزدەرىڭىز بىلەسىزدەر، ءقازىر الماتىنىڭ بارلىق اۋداندارى تەڭ الەۋمەتتىك، كولىكتىك جانە رەكرەاسيالىق ينفراقۇرىلىممەن جانە ءومىردىڭ جوعارى ستاندارتتارىمەن قامتاماسىز ەتىلەتىن پوليورتالىقتىق قاعيدات بويىنشا دامىپ كەلەدى. بۇل جوبا پوليورتالىقتىڭ جارقىن ۇلگىسى بولادى"، - دەدى الىشەر ءابدىقادىروۆ.
جۇمىس ساپارىنىڭ قورىتىندىسى بويىنشا مەردىگەر ۇيىمعا جۇمىس قارقىنىن ارتتىرۋ جانە بەلگىلەنگەن مەرزىمدە جاعالاۋدى اباتتاندىرۋدى ساپالى اياقتاۋ تاپسىرىلدى.