بومبا بار دەپ ايتىپ بالەگە قالدى

استانا حالىقارالىق اۋەجايىنان استانا-الماتى باعىتى بويىنشا ۇشىپ بارا جاتقان جولاۋشى تىركەۋ كەزىندە وزىمەن بىرگە بومبا بار ەكەنىن ايتقان.

اۋەجايدا دابىل قاعىلىپ، قىزمەتكەرلەر نىساندى شۇعىل تەكسەرۋگە ءماجبۇر بولدى. الايدا استانا حالىقارالىق اۋەجايىنىڭ اۆياسيالىق قاۋىپسىزدىك قىزمەتىندەگىلەر ەشقانداي جارىلعىش زاتتىڭ نىسان اۋماعىندا جوق ەكەنىن انىقتادى، دەپ حابارلايدى Almaty-akshamy.kz Elorda.info سايتىنا سىلتەمە جاساپ. 

جارىلعىش زات تۋرالى جالعان حابار بەرگەن جولاۋشى رەيستەن شەتتەتىلىپ، جەلىلىك پوليسيا ءبولىمى قىزمەتكەرلەرىنە تاپسىرىلدى. ءقازىر جولاۋشىعا قاتىستى ق ر قك 273-بابى بويىنشا قىلمىستىق ءىس قوزعالدى.

«اۋەجاي – ستراتەگيالىق ماڭىزدى نىسان. مۇندا كەلگەن ءار جولاۋشى ۇشاققا وتىرماس بۇرىن ءجىتى تەكسەرىلەدى. جارىلعىش زات تۋرالى جالعان اقپارات بەرگەن جولاۋشى ءوزىنىڭ تۇسىنىكتەمەسىندە «ءبىر قىزدى ۇناتىپ، سوعان ازىلدەمەك نيەتتە» ايتقانىن جەتكىزدى. الايدا اۆياسيالىق قاۋىپسىزدىك ازىلدەۋگە كەلمەيتىن تاقىرىپ. سوندىقتان جولاۋشىلاردان اۋەجايدىڭ تەكسەرۋ قىزمەتىنە جاۋاپكەرشىلىكپەن قاراپ، جارىلعىش زات تۋرالى جالعان اقپارات تاراتپاۋىن سۇرايمىز»، - دەدى «نۇرسۇلتان نازاربايەۆ حالىقارالىق اۋەجايى» اق PR قىزمەتىنىڭ باسشىسى تويگۇل جۋبانيسوۆا.

جىل باسىنان بەرى استانا حالىقارالىق اۋەجايىندا  جارىلعىش زات تۋرالى جالعان اقپارات بەرۋ بويىنشا 30 ءىس تىركەلگەن.