تەرروريستىك توپتىڭ جۇمىسىنا قاتىسقانى ءۇشىن قىلمىستىق جاۋاپكەرشىلىككە تارتۋ ماقساتىندا قازاقستان ازاماتى ەلگە جەتكىزىلدى.
بۇل تۋرالى باس پروكۋراتۋرانىڭ باسپا ءسوز قىزمەتى ءمالىم ەتتى، دەپ حابارلايدى اlmaty-akshamy.kz 24.kz-كە سىلتەمە جاساپ.
باس پروكۋراتۋرا، ۇلتتىق قاۋىپسىزدىك كوميتەتى جانە ءىىم ينتەرپولىنىڭ قىزمەتكەرلەرى قازاقستان رەسپۋبليكاسى سىرتقى ىستەر مينيسترلىگىنىڭ جاردەمدەسۋى ارقىلى بولگاريا رەسپۋبليكاسىنان قازاقستاننىڭ ازاماتىن تەرروريستىك توپتىڭ جۇمىسىنا قاتىسقانى ءۇشىن قىلمىستىق جاۋاپكەرشىلىككە تارتۋ ماقساتىندا ەكستراديسيالادى. ول راديكالدى ءدىني اعىمنىڭ قولداۋشىسى بولا تۇرا، 2015 جىلى سيريا اراب رەسپۋبليكاسىنىڭ اۋماعىنا بارىپ تەرروريستىك توپتاردىڭ ءبىرىنىڭ قۇرامىنا كىرگەن - دەلىنگەن حابارلامادا.
وسىعان بايلانىستى وعان قاتىستى سوتقا دەيىنگى تەرگەپ-تەكسەرۋ باستالىپ، حالىقارالىق ىزدەۋ جاريالاندى.
بيىل مامىر ايىندا ول بولگاريا اۋماعىندا ۇستالدى.
قازىرگى ۋاقىتتا كۇدىكتى استانا قالاسىنىڭ تەرگەۋ يزولياتورىنا قاماۋعا الىندى.
فيگۋرانتتى ەكستراديسيالاۋ بولگاريا تاراپىمەن 2014 جىلعى 14 قاراشاداعى ادامداردى ۇستاپ بەرۋ تۋرالى ەكىجاقتى شارتتىڭ بولۋىنا بايلانىستى مۇمكىن بولدى.
وعان ايىپ تاعىلعان قىلمىس ءۇشىن مۇلىكتى تاركىلەۋمەن بىرگە 8 جىلدان 12 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن.