– مەملەكەت باسشىسىنىڭ كەزەكتى جولداۋىنىڭ مازمۇنى تەرەڭدە جاتىر. ەل يگىلىگىنە باعىتتالعان بيىلعى باستى قۇجات حالىقتى ءبىر سەرپىلتىپ تاستادى. ەڭ الدىمەن ەلىمىزدە ءۇش وبلىستىڭ قۇرىلۋى ءبارىمىزدى قۋانتتى. اسىرەسە، وسى ايماقتاردىڭ جۇرتشىلىعى بۇل جاڭالىقتى قۋانا قابىلدادى. سونداي-اق قاپشاعاي قالاسىنا قونايەۆتىڭ ەسىمىن بەرۋ دە حالىقتىڭ قولداۋىنا يە بولدى دەگەن سەنىمدەمىن.
دالىرەك ايتقاندا، پرەزيدەنت جۇرتشىلىقتان وسىنداي ۇسىنىس تۇسسە، قولدايتىنىن جەتكىزدى. ەسكەرەتىن جايت، مەملەكەت باسشىسى ءوزىنىڭ ءبىر سوزىندە «مۇنى حالىققا جاعىنۋ ءۇشىن جاساپ جاتقان جوقپىن» دەگەن ەدى. ياعني، بۇل ەلدىڭ ساياسي ەكونوميكالىق جاعدايىن وركەندەتۋ ماقساتىندا جۇزەگە اسىرىپ جاتقانىن تىلگە تيەك ەتتى. مۇنىڭ بارلىعى يگى باستامانىڭ باسى ەكەنىنە سەنىمدىمىن!
جولداۋدا قاڭتار دۇربەلەڭى ماسەلەسى ءسوز بولدى. قاڭتار وقيعاسىنا ءبىر شەتى جاستار اراسىنداعى جۇمىسسىزدىقتىڭ بەلەڭ الۋى سەبەپ بولعانداي. ويتكەنى جۇمىسسىزدىق قىلمىسقا يتەرمەلەيدى. «تاماعى توقتىق، جۇمىسى جوقتىق ازدىرار ادام بالاسىن» دەيدى حاكىم اباي. ەلىمىزدە سوڭعى كەزدەرى بولىپ جاتقان لاڭكەستىك ارەكەتتەردىڭ، ءتۇرلى زاڭ بۇزۋشىلىقتاردىڭ، جاستار اراسىنداعى قىلمىستىڭ كوبەيۋى جۇمىسسىزدىقتان. سانانى تۇرمىس بيلەگەن زاماندا وسى ولقىلىقتىڭ ورنى تولتىرىلسا يگى.
سونىمەن قاتار ەل حالقىنىڭ الەۋەتىن كوتەرۋگە باعىتتالعان بيىلعى جولداۋدا جاڭاشىلدىق، ۇلكەن موتيۆاسيا بار دەر ەدىم. قۇجاتتا ادام مەن ونىڭ مۇددەسىنە باسىمدىق بەرىلىپ تۇر. ويتكەنى ەلىمىزدىڭ باستى بايلىعى – ادام. سوندىقتان قازاقستاندىقتاردىڭ جاقسى تۇرمىسى عانا ەمەس، سونداي-اق الاڭسىز بولاشاعى اركەز باستى ورىندا. بۇل رەتتە مەملەكەت باسشىسى حالىقتىڭ باقىتتى بولعانىن ەرتەڭ ەمەس، بۇگىن كورگىسى كەلەتىنىن ايتتى. ول ءوز سوزىندە «ەلىمنىڭ اماندىعى مەن جەرىمنىڭ تۇتاستىعىنان اسقان ەشبىر قۇندىلىق جوق.
مەنى ەڭ الدىمەن حالقىمنىڭ بولاشاعى قانداي بولاتىنى تولعاندىرادى» دەدى. بيلىك حالىققا جاقىنداعان سايىن ەلدىڭ دە كوڭىل-كۇيى كوتەرىلىپ، بەرەكەسى ارتا تۇسەتىنى انىق. ءسوز بەن ءىستىڭ اراسىندا الشاقتىق بولماۋ كەرەكتىگىن پرەزيدەنت ءاردايىم ەسكە سالىپ وتىر. بيلىك پەن حالىقتىڭ اراسىن جاقىنداتۋعا كوپ كوڭىل بولەدى. الەمدەگى تۇراقسىزدىق پەن حالىقارالىق شيەلەنىس جايلاعان وسىناۋ الماعايىپ ۋاقىتتا ەل حالقى كۇش-جىگەرىن بىرىكتىرۋى قاجەت.