قۇجات 28 ساۋىرگە دەيىن eGov.kz ەلەكترون ۇكىمەت پورتالى ارقىلى ونلاين قابىلدانادى.
قازاقستاندا «بولاشاق» ستيپەنديالىق باعدارلاماسى اياسىندا كونكۋرسقا قاتىسۋعا ءوتىنىم قابىلداۋدىڭ ەكىنشى لەگى باستالدى، دەپ حابارلايدى Almaty-akshamy.kz
2023 جىلى «بولاشاق» باعدارلاماسى اياسىندا ءبىلىم الۋعا 555 ستيپەنديا ءبولىندى. ونىڭ ىشىندە ماگيستراتۋرا جانە رەزيدەنتۋرا باعدارلامالارىنا 395 ستيپەنديا، دوكتورانتۋراعا 50 ستيپەنديا، تاعىلىمدامادان ءوتۋ ءۇشىن 110 ستيپەنديا ءبولىندى.
باسىم ماماندىقتار تىزىمىنە 262 ماماندىق كىردى. ۇمىتكەرلەر روبوتوتەحنيكا، سەرۆيستىك پلاتفورمالاردى ازىرلەۋ، جاسىل تەحنولوگيالار، قوعامدىق دەنساۋلىق ساقتاۋ، ينكليۋزيۆتى ءبىلىم بەرۋ جانە ت.ب. سىندى ەڭبەك نارىعىندا وزەكتى ماماندىقتار بويىنشا شەتەلدە دايىندىقتان وتەدى.
«ينجەنەرلىك-تەحنيكالىق جانە مەديسينالىق كادرلارعا ارنالعان كۆوتالار بەكىتىلدى. ەندى ولار الدىمەن مەرزىمى 12 ايعا دەيىنگى تىلدىك دايىندىقتان ءوتىپ، شەتەلدىك جوعارى وقۋ ورنىنا جەڭىلدەتىلگەن شارتتارمەن تۇسە الادى. ولارعا شاقىرتۋ تاپسىرۋ تالابى قويىلمايدى. بۇل اتالعان باعىتتار بويىنشا تۇسەتىندەر ءۇشىن مۇمكىندىكتەردى كەڭەيتەدى. سونىمەن قاتار بيىل ۇمىتكەرلەرگە قويىلاتىن تالاپتار كۇشەيتىلدى. ەندى دوكتوراتۋراعا تۇسەتىندەردى قوسپاعاندا، كانديداتتاردىڭ بارلىعى شەت ءتىلى بويىنشا سەرتيفيكات تاپسىرۋعا مىندەتتى"، - دەدى "حالىقارالىق باعدارلامالار ورتالىعى" اق باسقارما ءتوراعاسى ولجاس ساكەنوۆ.
بيىلعى تاعى ءبىر جاڭالىق - باعدارلاما اياسىندا وقىتۋدى قوسا قارجىلاندىرۋ بەكىتىلدى. شەتەلدىك جوو-نىڭ گرانتىن ۇتىپ العان ۇمىتكەرلەردىڭ "بولاشاق" شەڭبەرىندە قوسىمشا قارجىلاندىرۋدى الۋعا مۇمكىندىگى بار. مۇنداي ستيپەندياتتار ءۇشىن ەڭبەك ءوتىلى 1 جىلعا قىسقاردى.
ەسكە سالا كەتەيىك، بيىل العاشقى لەگىندە شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ شەشىمىمەن "بولاشاق" ستيپەندياسى 25 قازاقستاندىققا تاعايىندالدى.
جىل سوڭىنا دەيىن وتىنىمدەردى قابىلداۋدىڭ تاعى ەكى لەگى وتەدى: 5 ماۋسىم مەن 7 شىلدە ارالىعىندا، سونىمەن قاتار 17 شىلدە مەن 15 قىركۇيەك ارالىعىندا.