ۇلتتىق بانك وتكەن ايدا ۆاليۋتالىق ينتەرۆەنسيالار جۇرگىزگەن جوق.
ناۋرىزدىڭ قورىتىندىسى بويىنشا، تەڭگە باعامى 1 اقش دوللارى ءۇشىن 452،7 تەڭگەگە دەيىن 1،6%-عا السىرەدى. ال قازاقستان قور بيرجاسىنداعى ساۋدا-ساتتىقتىڭ ورتاشا كۇندىك كولەمى ءبىر ايدا 130 ملن دوللاردان 164 ملن اقش دوللارىنا دەيىن ۇلعايدى، دەپ حابارلايدى اlmaty-akshamy.kz Azattyq Ruhy-نا سىلتەمە جاساپ.
ۇلتتىق بانك مالىمەتىنە سۇيەنسەك، ساۋدا-ساتتىقتىڭ جالپى كولەمى 3،1 ملرد اقش دوللارىن قۇرادى. ءبىر اي ىشىندە ۆاليۋتا نارىعىندا ەنەرگيا تاسىمالداۋ باعاسىنىڭ تومەندەۋى مەن اقش-تاعى جانە ەۋروايماقتاعى بانك سەكتورىنا قاتىستى الاڭداۋشىلىققا بايلانىستى نارىق قاتىسۋشىلارى سەنتيمەنتىنىڭ ناشارلاۋى اياسىندا قۇبىلمالىلىق ارتتى.
«كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋى وتكەن ايدا شامامەن 253 ملن اقش دوللارىن قۇرادى. كۆازيمەملەكەتتىك سەكتور كومپانيالارى ەكىنشى دەڭگەيلى بانكتەر ارقىلى ۆاليۋتا نارىعىندا ساتۋدى ءوز بەتىنشە جۇزەگە اسىرادى. ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ۆاليۋتا ساتۋ ناۋرىزدا 721 ملن اقش دوللارىن قۇرادى»، - دەلىنگەن قارجى نارىعىن رەتتەۋشىنىڭ حابارلاماسىندا.
ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 23%-ىن جانە كۇنىنە 40 ملن اقش دوللارىنان اسپايتىن مولشەردى كورسەتتى.
«ۇلتتىق بانك ۇلتتىق قورداعى قاراجاتپەن وپەراسيا جۇرگىزۋ كەزىندە نارىقتىڭ بەيتاراپ قاعيداتىن ساقتايدى. بۇل شەتەل ۆاليۋتاسىن ۇدايى ءارى بىركەلكى ساتۋدى بىلدىرەدى. بۇل تاجىريبە ۇلتتىق قور وپەراسيالارىنىڭ ۆاليۋتا نارىعىنا اسەرىن مەيىلىنشە ازايتۋعا مۇمكىندىك بەرەدى. ۇلتتىق بانك بجزق زەينەتاقى اكتيۆتەرىنىڭ ۆاليۋتالىق ۇلەسىن 30% دەڭگەيىندە ۇستاپ تۇرۋ ماقساتىندا ناۋرىزدا بيرجالىق ساۋدا-ساتتىقتا شەتەل ۆاليۋتاسىن ساتىپ الدى. ونىڭ جالپى سوماسى 232 ملن اقش دوللارىن نەمەسە نارىقتىڭ جالپى كولەمىنىڭ شامامەن 7%-ىن قۇرادى»، - دەلىنگەن حابارلامادا.
ۇلتتىق بانك ناۋرىزدا ۆاليۋتالىق ينتەرۆەنسيالار جۇرگىزگەن جوق.ساۋىردە ۇلتتىق قوردان ساتۋدىڭ ناقتى كولەمى قارجى مينيسترلىگىنىڭ رەسپۋبليكالىق بيۋدجەتكە ترانسفەرت بولۋگە ارنالعان وتىنىمدەرىنە بايلانىستى بولادى. الدىن الا بولجام بويىنشا، قارجى مينيسترلىگىنىڭ قاجەتتى ترانسفەرتتەر سوماسى بويىنشا قازىرگى بولجامدى باعدارلارىنىڭ نەگىزىندە ءساۋىر ايىندا ۇلتتىق بانك ۇلتتىق قوردان 550 ملن دوللاردان 650 ملن اقش دوللارىنا دەيىنگى مولشەردە ۆاليۋتا ساتۋدى جوسپارلاپ وتىر.
«ساۋىردە بجزق زەينەتاقى اكتيۆتەرىنىڭ ۆاليۋتالىق ۇلەسىن ۇستاپ تۇرۋ ءۇشىن 200 ملن دوللاردان 250 ملن اقش دوللارىنا دەيىنگى مولشەردە ۆاليۋتا ساتىپ الىنۋى مۇمكىن. ۇلتتىق بانك ترانسپارەنتتىلىك قاعيداتى اياسىندا ۆاليۋتا نارىعىندا جۇرگىزىلەتىن بارلىق وپەراسيا تۋرالى اقپاراتتى تولىق اشىپ كورسەتەتىن بولادى»، - دەيدى بانك وكىلدەرى.
قىسقا مەرزىمدى پەرسپەكتيۆادا تەڭگەنىڭ ديناميكاسى نارىققا قاتىسۋشىلاردىڭ كۇتۋلەرىنە، الەمدىك نارىقتارداعى احۋالعا جانە گەوساياسي جاعدايدىڭ وزگەرۋىنە بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانۋدى جالعاستىرادى.