«بولاشاق» ستيپەندياسى يەگەرلەرىنىڭ ءتىزىمى جاريالاندى

182 قازاقستاندىق «بولاشاق» حالىقارالىق ستيپەندياسىنىڭ يەگەرى اتاندى. ونىڭ ىشىندە 149 ادام الەمنىڭ ۇزدىك جوعارى وقۋ ورىندارىنىڭ ماگيستراتۋراسىندا، 7 ادام دوكتورانتۋراسىندا ءبىلىم الادى، 26 قازاقستاندىق الەمنىڭ جەتەكشى جوعارى وقۋ ورىندارى مەن وندىرىستىك ورتالىقتارىنا تاعىلىمدامادان وتەدى، دەپ حابارلايدى Almaty-akshamy.kz. 

ستيپەندياتتاردىڭ باسىم كوپشىلىگى جاراتىلىستانۋ-تەحنيكالىق باعىتتار بويىنشا شەتەلدە دايارلاناتىن بولادى.

«مەملەكەت باسىشىسىنىڭ تاپسىرماسى بويىنشا ينجەنەرلىك-تەحنيكالىق كادرلاردى دايارلاۋعا باسىمدىق بەرىلەدى. ۇمىتكەرلەردى قولداۋ ءۇشىن «ينجەنەرلىك-تەحنيكالىق قىزمەتكەرلەر» جاڭا جەڭىلدىك ساناتى ەنگىزىلدى. سونىمەن قاتار ءبىزدىڭ باستامامىزبەن مەديسينالىق قىزمەتكەرلەردى ىرىكتەۋ قاعيدالارى جەتىلدىرىلدى»، - دەپ اتاپ ءوتتى «حالىقارالىق باعدارلامالار ورتالىعى» اق باسقارما ءتوراعاسى ولجاس ساكەنوۆ.

سونداي-اق شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ شەشىمىمەن 328 قازاقستاندىق عىلىمي تاعىلىمدامالار باعدارلاماسى بويىنشا گرانت يەگەرى اتاندى.

وتاندىق عالىمدار ينجەنەرلىك عىلىمدار، اقپاراتتىق-كوممۋنيكاسيالىق تەحنولوگيالار، ءبىلىم بەرۋ، اگروونەركاسىپتىك كەشەن، مەديسينا جانە ت.ب. سالالاردا زەرتتەۋلەر جۇرگىزۋ ءۇشىن الەمنىڭ جەتەكشى عىلىمي ورتالىقتارىنا جىبەرىلەتىن بولادى.

ەستەرىڭىزگە سالا كەتەيىك، بيىل «بولاشاق» حالىقارالىق ستيپەندياسىن تاعايىنداۋ كونكۋرسىنا قاتىسۋعا قۇجات قابىلداۋ ءتورت لەكتە وتەدى. ءۇشىنشى لەگى بيىلعى جىلعى 7 شىلدەگە دەيىن جالعاسادى. جىل سوڭىنا دەيىن تاعى ءبىر لەگى 17 شىلدە مەن 15 قىركۇيەك ارالىعىندا وتەتىن بولادى.

عىلىمي تاعىلىمدامالار باعدارلاماسى بويىنشا كونكۋرستىق ىرىكتەۋگە قاتىسۋعا وتىنىمدەردى قابىلداۋ 2023 جىلعى 28 تامىز بەن 13 قازان ارالىعىندا جالعاساتىن بولادى.

«بولاشاق» ستيپەندياسى يەگەرلەرىنىڭ ءتىزىمى مەن عىلىمي تاعىلىمدامالار باعدارلاماسى بويىنشا گرانتتار يەگەرلەرىنىڭ ءتىزىمى مىنا جەردەن كورۋگە بولادى.