اتالعان شارا قونايەۆ قالاسىندا دەمەۋشىلەردىڭ قارجىلاندىرۋىمەن وتەدى.
الماتى وبلىسى اكىمدىگى باسپا ءسوز قىزمەتىنىڭ مالىمەتىنشە، بۇل جوبانى مەملەكەتتىك بيۋدجەتتەن 183 ملن تەڭگەگە قارجىلاندىرۋ جوسپارلانعان. الايدا، دەمەۋشىلەر تارتۋ جۇمىستارى وڭ ناتيجە بەرىپ، «مىڭ بوياۋلى اسپان» حالىقارالىق شار فەستيۆالى كوممەرسيالىق جوبا رەتىندە جەرگىلىكتى دەمەۋشىلەر مەن كاسىپكەرلىك قۇرىلىمدارمەن كەلىسىم جاساۋ ارقىلى وتكىزىلەتىن بولىپ، قايتا ماقۇلداندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
فەستيۆال قونايەۆ قالاسىنىڭ ءىرى ءىس-شارالار مەن وتباسىلىق مەرەكەلەردى وتكىزۋ ورنى رەتىندە وڭ ءيميدجىن قالىپتاستىرادى جانە الماتى وبلىسىندا وقيعالى ءتۋريزمدى ىلگەرىلەتۋدىڭ ماڭىزدى قۇرامداس بولىگى رەتىندە ايقىندالادى. ونىڭ نەگىزگى ماقساتى – وبلىستىڭ، وسى ايماقتىڭ جانە مەملەكەتىمىزدىڭ ءتۋريزمى مەن ەكونوميكاسىن دامىتۋعا جاردەمدەسۋ.
وقيعالى تۋريزم – الەمدە كەڭ تانىمالدىققا يە بولعان جانە قازاقستاندا دامۋ ساتىسىندا تۇرعان تۋريستىك قىزمەتتىڭ پەرسپەكتيۆالىق باعىتى. ول باسقا تۋريستىك قىزمەت تۇرلەرىنىڭ ىشىندە ينتەراكتيۆتىلىگىمەن، ياعني ءىس-شاراعا ادامداردىڭ كوپ بولىگىن تارتۋمەن، ەموسيونالدىلىعىمەن جانە تاقىرىپتىق ارتۇرلىلىگىمەن ەرەكشەلەنەدى. ويتكەنى، الماتى وبلىسى ىشكى جانە كەلەتىن تۋريستەر سانى بويىنشا رەسپۋبليكادا الدىڭعى قاتاردا.
«مىڭ بوياۋلى اسپان» - ازاماتتاردىڭ بىرلىگى مەن وتباسىلىق قۇندىلىقتاردى ءبىرىنشى ورىنعا قوياتىن فەستيۆال. فەستيۆالدا اسپانعا الىپ شارلار مەن باتپىراۋىقتاردى ۇشىرۋ جوسپارلانعان. وعان الەمنىڭ ءتۇرلى ەلدەرىنەن وكىلدەر قاتىسادى.
شارلار قونايەۆ قالاسىنىڭ اسپانىن بەزەندىرىپ، ونى كوركەم كەنەپكە اينالدىرادى. فەستيۆال ينتەراكتيۆتى كوركەم باعدارلامامەن سۇيەمەلدەنەدى. شارلارمەن ۇشۋدان باسقا، باتپىراۋىق سايىسى، بالالار مەن ەرەسەكتەرگە ارنالعان ينتەراكتيۆتى ءىس-شارالار، جارقىن ينتەرنەت-كونتەنتكە ارنالعان فوتوايماقتار، مۋزىكالىق جانە تەاترلىق شوۋلار، تۇنگى جارىق قويىلىمدارىنا ۇلاسادى.