ششۋچينسك قالاسىندا تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى اراسىندا رەسپۋبليكالىق جاستار سلەتى ءوز جۇمىسىن باستادى. ەلىمىزدىڭ تۇكپىر-تۇكپىرىنەن كەلگەن 100-دەن استام بەلسەندى جاس جۇمىسشى ماماندىقتارىنىڭ كەلەشەگىن تالقىلاپ، كاسىبي شەبەرلىكتەرىن شىڭداۋعا جانە جاڭا سەرپىن الۋعا جينالدى.
ءىس-شارانىڭ سالتاناتتى اشىلۋىنا ق ر پرەمەر-مينيسترىنىڭ ورىنباسارى ەرمەك كوشەربايەۆ، وقۋ-اعارتۋ ءمينيسترى عاني بەيسەمبايەۆ، اقمولا وبلىسىنىڭ اكىمى مارات احمەتجانوۆ، ق ر پارلامەنتى ءماجىلىسىنىڭ دەپۋتاتتارى جانە ءبىرقاتار مەملەكەتتىك ورگانداردىڭ وكىلدەرى قاتىستى.
پرەمەر-مينيستردىڭ ورىنباسارى ەرمەك كوشەربايەۆ سلەت قاتىسۋشىلارىن قۇتتىقتاپ، جۇمىسشى ماماندىقتارىنىڭ ەل دامۋىنداعى ماڭىزىن اتاپ ءوتتى:
"مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالادى. بۇل – تەك بەلگىلى ءبىر سالا بويىنشا ماماندار دايارلاۋ ەمەس، جالپى ەڭبەككە دەگەن كوزقاراستى قايتا قاراۋ قاجەتتىگىن بىلدىرەدى.
ۇزاق جىلدار بويى قوعامدا جۇمىسشى كاسىپتەرىنە قاتىستى تەرىس كوزقاراس قالىپتاسىپ كەلدى. الايدا بۇگىنگى كۇنى جاعداي وزگەردى. قازىرگى زاماننىڭ جۇمىسشىسى – جاڭا تەحنولوگيالاردى مەڭگەرگەن، ەڭبەك نارىعىندا جوعارى سۇرانىسقا يە كاسىبي مامان.
ءبىز، مەملەكەت رەتىندە، ەڭبەكتى قادىرلەۋ مادەنيەتىن قايتا جاڭعىرتىپ، جۇمىسشى ەڭبەگىنە لايىقتى قۇرمەت قايتارۋعا بار كۇشىمىزدى سالىپ وتىرمىز. ويتكەنى يندۋستريالىق دامۋ، ءوندىرىستىڭ جاڭعىرۋى مەن ەكونوميكالىق تۇراقتىلىق — ءبارى سىزدەردىڭ قاجىرلى ەڭبەكتەرىڭىزگە بايلانىستى. وسى وزگەرىستەردىڭ الدىڭعى شەبىندە – سىزدەر، جاس ماماندار تۇرسىزدار"، – دەدى ەرمەك كوشەربايەۆ.