2027 جىلدان باستاپ ەلىمىزدە مەديسينالىق كومەكتىڭ ءبىرىڭعاي پاكەتى قولدانىسقا ەنەدى. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا الماتى قالاسى قوعامدىق دەنساۋلىق ساقتاۋ باسقارماسىنىڭ ءبولىم جەتەكشىسى ءلايلا يمانعالييەۆا حابارلادى.
«زاڭعا ەنگىزىلگەن وزگەرىستەرگە سايكەس، 2025 جىلدىڭ ەكىنشى جارتىسىنان باستاپ بارلىق ونكولوگيالىق سكرينينگتەر تەگىن جاسالاتىن بولدى. ياعني، ونكوسكرينينگتەن ءوتۋ ءۇشىن ساقتاندىرۋ ستاتۋسى تالاپ ەتىلمەيدى. سونداي-اق، 2026 جىلدان باستاپ الەۋمەتتىك ماڭىزى بار 8 دەرتكە كۇدىك كەلتىرىلگەن جاعدايدا كونسۋلتاتيۆتىك-دياگنوستيكالىق كومەك تەگىن كورسەتىلەدى. بۇعان دەيىن اتالعان قىزمەتتەر تەك ۆيچ پەن تۋبەركۋلەز سىندى 2 سىرقات بويىنشا عانا تەگىن بولاتىن»، - دەپ اتاپ ءوتتى ءلايلا يمانعالييەۆا.
2026 جىلدان باستاپ امبۋلاتورلىق دياليز، كونسۋلتاتيۆتىك-دياگنوستيكالىق كومەك، امبۋلاتورلىق دەڭگەيدە دارى-دارمەكپەن قامتاماسىز ەتۋ، ديناميكالىق باقىلاۋعا جاتاتىن 12 سىرقات توبى بويىنشا جوسپارلى ستاسيونارلىق جانە ستاسيوناردى الماستىراتىن كومەك ءمامس پاكەتى ارقىلى كورسەتىلەتىن بولادى. بۇلار: باۋىر، قان مەن قان شىعارۋ ورگاندارىنىڭ، ءىش قۇرىلىس اۋرۋلارى، جۇقپالى ەمەس ەنتەريت جانە كوليت، ارتروپاتيا، دورسوپاتيا، قالقانشا بەزى اۋرۋلارى، قاتەرلى ەمەس ادەنوما ىسىگى، ءسۇت بەزدەرىنىڭ قاتەرلى ەمەس ديسپلازياسى، ايەلدەردىڭ جىنىستىق اۋرۋلارى، برونح-وكپە ديسپلازياسى، ءتۋابىتتى جۇرەك اقاۋى، ىشتە پايدا بولعان كەمىستىكتەر ت.ب.
سپيكەردىڭ ايتۋىنشا، بۇل باستامالار 2027 جىلدان باستاپ قارجىلاندىرۋدىڭ ساقتاندىرۋ ۇلگىسىنە باسىمدىق بەرۋگە مۇمكىندىك جاسايدى. ناتيجەسىندە دەنساۋلىق ساقتاۋ سالاسىنا جۇمسالاتىن شىعىننىڭ 35% تەگىن مەديسينالىق كومەك پاكەتىنەن (تمككك)، 65% ءمامس پاكەتىنەن الىنباق. قازىرگى تاڭدا شىعىننىڭ 57% تمككك پاكەتىنە، قالعان 43% مامس-كە تيەسىلى.
2026 جىلدان باستاپ تمككك پاكەتى مىناداي قىزمەتتەردەن تۇرادى:
• جەدەل جاردەم؛
• باستاپقى مەديسينالىق-سانيتارلىق كومەك؛
• 8 ءتۇرلى الەۋمەتتىك ماڭىزى بار اۋرۋعا كۇدىك كەلتىرىلگەن جاعدايدا دياگنوستيكا جاساۋ؛
• 8 ءتۇرلى الەۋمەتتىك ماڭىزى بار اۋرۋعا شالدىققاندارعا ستاسيونارلىق جانە ستاسيوناردى الماستىراتىن كومەك؛
• ونكوسكرينيگتەر؛
• ينفەكسيا؛
• ساقتاندىرىلماعانداردى شۇعىل جاعدايلاردا ستاسيوناردا ەمدەۋ؛
• پاللياتيۆتىك كومەك؛
• قان پرەپاراتتارىمەن قامتاماسىز ەتۋ.
ال، ءمامس پاكەتىندە ساقتاندىرىلعان ازاماتتارعا مىناداي قىزمەتتەر كورسەتىلمەك:
• كونسۋلتاتيۆتىك-دياگنوستيكالىق قىزمەتتەر، تمككك پاكەتىنەن تىس دارى-دارمەكپەن قامتاماسىز ەتۋ، سونىڭ ىشىندە، سوزىلمالى اۋرۋلاردىڭ 26 ءتۇرى بويىنشا؛
• ستاسيونارلىق جانە ستاسيوناردى الماستىراتىن كومەك، سونىڭ ىشىندە، سوزىلمالى اۋرۋلاردىڭ 26 ءتۇرى بويىنشا؛
• جوعارى تەحنولوگيالىق مەديسينالىق كومەك؛
• مەديسينالىق رەابيليتاسيا.