«بولاشاق» بويىنشا وقۋعا بولاتىن ماماندىقتار ءتىزىمى كەڭەيتىلدى

عالىمدار ءۇشىن «بولاشاق» باعدارلاماسى بويىنشا شەتەلدىك تاعىلىمدامادان وتۋگە ارنالعان ماماندىقتار تىزىمىنە تاعى 18 ماماندىق ەنگىزىلدى

ەندى ولار «بيولوگيا، مولەكۋلالىق بيولوگيا»، «ۆەتەريناريا»، «كومپيۋتەرلىك لينگۆيستيكا»، «اۋىل شارۋاشىلىعى»، «قۇرىلىس»، «جوبالاۋ»، «شاحتا قۇرىلىسى»، «فيزيكا»، «بايلانىس جانە اقپارات تاراتۋ جۇيەسى»، «راديوتەحنولوگيا»، «مەحانيكا»، «ستاتيستيكا»، «ەسەپتەۋ تەحنولوگياسى»، «انتروپولوگيا»، «ورمان رەسۋرستارىن قورعاۋ»، «ۆاكسينولوگيا»، «ماتەماتيكا» باعىتتارى بويىنشا مەملەكەت ەسەبىنەن الەمنىڭ جەتەكشى ۋنيۆەرسيتەتتەرى مەن عىلىمي ورتالىقتارىندا تاعىلىمدامادان وتە الادى، دەپ حابارلايدى Almaty-akshamy.kz.

ايتا كەتەيىك، 8 ماماندىق قولدانىستاعى ارالاس ماماندىقتارعا ەنگىزىلىپ، تاعى 10-ى جاڭا ماماندىق رەتىندە قوسىلدى.

قازاقستاندىق عالىمدار گارۆارد ۋنيۆەرسيتەتى، سوربوننا ۋنيۆەرسيتەتى، كولۋمبيا ۋنيۆەرسيتەتى، يەل ۋنيۆەرسيتەتى، گونكونگ عىلىم جانە تەحنولوگيا ۋنيۆەرسيتەتى مەن باسقا دا شەتەلدىك جوعارى وقۋ ورىندارىندا تاعىلىمدامادان وتە الادى.

وسىلايشا، 2021 جىلى قازاقستاندىقتاردىڭ 147 ماماندىق بويىنشا تاعىلىمدامادان ءوتۋ مۇمكىندىگى بار، ونىڭ ىشىندە يننوۆاسيا جانە جاڭا تەحنولوگيالار باعىتى بويىنشا 14، يندۋستريالىق ينجەنەريا باعىتى – 28، جاراتىلىستانۋ عىلىمدارى – 9، الەۋمەتتىك عىلىمدار – 40، «ءبىلىم بەرۋ» باعىتى – 9، «مەديسينا» باعىتى – 37 جانە «كرەاتيۆتى يندۋستريا» باعىتى بويىنشا 13 ماماندىق بار.

ەستەرىڭىزگە سالا كەتەيىك، بيىل «عالىمدار» جاڭا ساناتى بويىنشا 500 ستيپەنديا ءبولىندى. ستيپەنديالاردىڭ جالپى سانى 1055-كە دەيىن ءوستى. ونىڭ ىشىندە دەنساۋلىق ساقتاۋ، مادەنيەت، سپورت سالاسىنىڭ قىزمەتكەرلەرى، پەداگوگتەر، مەملەكەتتىك قىزمەتكەرلەر، ينجەنەر-تەحنيكتەر ءۇشىن 5 سانات بويىنشا تاعىلىمدامادان وتۋگە 110 گرانت ءبولىندى.

كونكۋرسقا قاتىسۋ ءۇشىن قۇجاتتاردى قابىلداۋ 2021 جىلعى 28 قازانعا دەيىن جالعاسادى.

باعدارلامانىڭ وپەراتورى — ق ر بعم حالىقارالىق باعدارلامالار ورتالىعى.