اقپاراتتى قازاقستان بوكس فەدەراسياسى تاراتتى.
قايرات ءساتجانوۆ بوكستان ۇلتتىق قۇرامانىڭ باس باپكەرى بولىپ تاعايىندالدى، دەپ حابارلايدى aqshamnews.kz
قايرات تۇرسۇنقان ۇلى ءساتجانوۆ - 54 جاستا، قازاقستان رەسپۋبليكاسىنىڭ بوكستان ەڭبەك سىڭىرگەن جاتتىقتىرۋشىسى، قازاقستان رەسپۋبليكاسىنىڭ دەنە شىنىقتىرۋ جانە سپورت ۇزدىگى. باپكەرلىك ەڭبەك ءوتىلى - 34 جىل. 2021-2022 جىلدارى قازاقستان ۇلتتىق قۇراماسىنىڭ باس باپكەرى قىزمەتىن اتقارعان. 2024 جىلدان قازاقستان جاستار قۇراماسىنىڭ اعا باپكەرى.
ءساتجانوۆتىڭ جەتەكشىلىگىمەن 2021 جىلى قازاقستان قۇراماسى الەم چەمپيوناتىندا (سەربيا) II كوماندالىق ورىن (2 التىن، 2 كۇمىس، 1 قولا مەدال) الدى.
2022 جىلى ازيا چەمپيوناتىندا (يوردانيا) ءىى كوماندالىق ورىن (3 التىن، 6 كۇمىس، 3 قولا) ەنشىلەگەن.
2024 جىلى استانادا وتكەن جاستار اراسىنداعى ازيا چەمپيوناتىندا قازاقستان كومانداسى I كوماندالىق ورىن (5 التىن، 1 كۇمىس، 3 قولا) الدى.
قايرات ءساتجانوۆ جاتتىقتىرۋشى رەتىندە 7 الەم چەمپيونىن، 43 ازيا چەمپيونىن دايىنداعان.
قازىرگى ۋاقىتتا جاڭا جاتتىقتىرۋشىلار قۇرامى قۇرىلۋدا، ونىڭ ىشىندە: شەتەلدىك جاتتىقتىرۋشى مامان، جالپى دەنە دايارلىعى بويىنشا جاتتىقتىرۋشى، سونداي-اق عىلىمي توپ ماماندارى شاقىرىلادى.
سونىمەن قاتار، باس جاتتىقتىرۋشىنىڭ جەكە شاكىرتى بولمايدى دەگەن تالاپ ەنگىزىلدى.