يوردانيا استاناسى اممان قالاسىندا بوكستان ءوتىپ جاتقان ازيا چەمپيوناتىندا ساكەن بيبوسىنوۆ فينالعا شىقتى، دەپ حابارلايدى Almaty-akshamy.kz Inform.kz-كە سىلتەمە جاساپ.
كەشكى سەسسيانى قوس بىردەي الەم چەمپيونى ساكەن بيبوسىنوۆ پەن جاپونيالىق تومويا سۋبوي (51 كگ) باستادى.
ولاردىڭ ەكەۋى دە 2021 جىلى بەلگرادتا وتكەن الەم بىرىنشىلىگىندە توپ جارعان بولاتىن. 54 كەلىگە دەيىنگى سالماقتا ت.سۋبوي سوڭعى جەكپە-جەكتە قازاقستاندىق ماحمۋد سابىرحاننان ايلاسىن اسىرعان ەدى. سوندىقتان بۇگىن ساكەن كوماندالاسىنىڭ دا ەسەسىن قايتارۋى ءتيىس ەدى.
قازاقستاندىق بوكسشى بىردەن ۇرىس تىزگىنىن قولعا الىپ، قارسىلاسىنان ءبىر باس جوعارى ەكەندىگىن تانىتا ءبىلدى. تورەشىلەر ەسەبى – 5:0، ساكەن بيبوسىنوۆتىڭ پايداسىندا.
وسىلايشا، س.بيبوسىنوۆ قازاقستان قۇراماسىنان جەتىنشى بولىپ فينالعا جولداما الدى.
كەشكى سەسسيادا سونداي-اق اسلانبەك شىمبەرگەنوۆ (71 كگ)، اعايىندى جىگىتتەر نۇربەك ورالباي (80 كگ) مەن ايبەك ورالباي (92 كگ) فينالدىڭ جولداماسى ءۇشىن كۇرەسەدى.
سۋرەت: Olympic.kz