الماتىدا 1 قىركۇيەكتەن باستاپ 1-سىنىپ وقۋشىلارىنا تۋبەركۋلەزگە قارسى ەكپە ەگۋ ناۋقانى جۇرگىزىلدى، دەپ حابارلايدى Almaty-akshamy.kz Inform.kz-كە سىلتەمە جاساپ.
ۆەدومستۆونىڭ مالىمەتىنشە، بالالارعا مانتۋ ەگۋ ناۋقانىنىڭ قورىتىندىسى بويىنشا 6182 بالادان (22،7%) وڭ ناتيجە انىقتالدى.
«وڭ ناتيجە انىقتالعان 6182 بالاعا رەكومبينانتتى تۋبەركۋلەز اللەرگەنى (رتا) سىناماسى جاسالدى. ناتيجەسىندە تۋبەركۋلەز ميكوباكتەريالارىن العاش رەت جۇقتىرعان 39 بالا انىقتالدى. ولارعا پروفيلاكتيكالىق ەم تاعايىندالدى»،- دەلىنەدى حابارلامادا.
ۆەدومستۆو مالىمەتىنشە، بالالاردا تۋبەركۋلەزدىڭ دامۋىنىڭ بىردەن ءبىر سەبەبى - تۋبەركۋلەزبەن اۋىراتىن ناۋقاسپەن ۇزاق قارىم-قاتىناستا بولۋ. سول كەزدە بالانىڭ اعزاسى ميكوباكتەريالاردى جۇقتىرادى.
«مەگاپوليستىڭ ەپيدەميولوگتارى تۋبەركۋلەزدى ءساتتى ەمدەۋدىڭ ءبىر شارتى - اۋرۋدى ەرتە انىقتاۋ ەكەنىن ەسكە سالادى. اۋرۋدى ەرتە انىقتاۋ ءۇشىن تۋبەركۋلەزدەن ساقتانىپ، اۋرۋدىڭ بەلگىلەرىن ءبىلۋ جانە دەر كەزىندە دارىگەرگە قارالۋ قاجەت»،- دەپ ەسكەرتتى قالالىق سانيتاريالىق-ەپيدەميولوگيالىق باقىلاۋ دەپارتامەنتى.
سۋرەت: Time.kz