ەلىمىزدە بودەنە جۇمىرتقاسىنا سۇرانىس ارتىپ كەلەدى. نۋتريسيولوگ ماماندار ونىڭ ەتى دە، جۇمىرتقاسى دا دارۋمەنگە تولى دەيدى. سوندىقتان قان ازدىق، قاتەرلى ىسىك، اسقازان اۋرۋلارىنا شالدىققان ازاماتتار بۇل ونىمگە ءجيى تاپسىرىس بەرە باستاعان.
ەرەكشە كاسىپتى يگەرۋگە بەت بۇرعان ازاماتتار دا مۇنى راستاپ وتىر، دەپ حابارلايدى Almaty-akshamy.kz qazaqstan.tv-گە سىلتەمە جاساپ.
جاڭابەك ەسبەرگەنوۆ 8 جىلدان بەرى بودەنە اسىرايدى. ونىڭ جۇمىرتقاسى مەن ەتىن ەلوردانىڭ ساۋدا دۇكەندەرىنە ساتىپ، تابىس تاۋىپ وتىر. كەلەشەكتە بودەنە فەرماسىن اشۋعا نيەتتى. كاسىپكەر بۇگىندە قۇستارىنىڭ سانىن 5 مىڭعا جەتكىزگەن.
«بۇل كاسىپتى ەكى ءجۇز جۇمىرتقادان باستادىق. بالاپان شىعارىپ، كوبەيتىپ، قازىرگى تاڭدا ءبىر شىعارعان كەزدە 2000-3000 بالاپان شىعارامىز. بۇل قۇستىڭ ارتىقشىلىقتارى كوپ. تۇماۋمەن اۋىرمايدى. بيت جۇقپايدى. سالمونەللا اۋرۋىمەن اۋىرمايدى. ويتكەنى دەنە قىزۋى 42 گرادۋس»، -دەيدى كاسىپكەر جاڭابەك ەسبەرگەنوۆ.
ءونىمنىڭ ءدامى قىشقىل بولعانمەن، پايداسى كوپ. وعان كەيىپكەرىمىزدىڭ اسقازان جاراسىنان بودەنەنىڭ شيكى جۇمىرتقاسىن ءىشىپ، ەمدەلگەنى دالەل. از ۋاقىتتا اۋرۋدان ايىققان جاڭابەك ەسبەرگەنوۆ ءقازىر وزگەلەرگە دە كەڭەس بەرىپ ءجۇر.
«توسەكتە تۇرا الماي بۇراتىلىپ جاتاتىنمىن. سول ۋاقىتتا اسقازانعا پايدالى ەكەنىن ءبىلدىم دە، ءىشىپ باستادىم. كۇنىنە اش قارىنعا 5-6 جۇمىرتقادان، 10-15 كۇننەن كەيىن اسقازانىم قويدى. 7-8 جىل ءوتتى. ءالى دەنساۋلىق سىر بەرگەن ەمەس»، -دەيدى كاسىپكەر جاڭابەك ەسبەرگەنوۆ.
ماماندار بۇل ءونىمدى تۇتىنۋ ارقىلى قاتەرلى ىسىك پەن قانازدىق، گينەكولوگيالىق اۋرۋلاردان ايىعۋعا بولاتىنىن ايتادى. باستىسى اش قارىنعا ءىشۋ كەرەك، الكوگولدىك سۋسىنداردى ارالاستىرماۋ قاجەت ەكەن.
«ونكولوگيا، «A» دارۋمەنىن جەتىسپەۋشىلىگى، تەمىردىڭ جەتىسپەۋشىلىگى، ماگنييدىڭ جەتىسپەۋشىلىگى، كالسييدىڭ جەتىسپەۋشىلىگى بولسا، بودەنە جۇمىرتقاسى پايدالى. جاي عانا پروفيلاكتيكا ءۇشىن 1 دانا، ال ەمدىك ماقساتتا بولسا، 2-3 دانادان جەسەڭىز بولادى»، -دەيدى نۋتريسيولوگ مامان گۇلبانۋ تايماحانوۆا.
بودەنە ءار 16 ساعات سايىن جۇمىرتقالايدى. ءقازىر ءونىمنىڭ نارىقتاعى قۇنى 50 تەڭگەدەن كەم ەمەس. ال ەتىنىڭ كەلىسى 5 مىڭنان اسادى. باعاسى قىمبات بولعانمەن، وعان دەگەن سۇرانىس جوعارى.