دارىگەرلەر جۇرەگىنە پىشاق تيگەن جىگىتتىڭ ءومىرىن ساقتاپ قالدى

پىشاق جۇرەكتىڭ سول جاق قارىنشاسىنا جانە سول جاق وكپەنىڭ تامىرىنا تيگەن.

ناۋقاس جاراقاتتانعاننان كەيىن 5-7 مينۋت ىشىندە قاننىڭ جارتىسىنان كوبىنەن ايىرىلعان، اۋرۋحاناعا ەس-تۇسسىز، نولدىك قىسىممەن تۇسكەن، دەپ حابارلايدى Almaty-akshamy.kz

دەنساۋلىق ساقتاۋ مينيسترلىگىنىڭ مالىمەتىنشە، جامبىل وبلىسى سارىسۋ اۋداندىق ورتالىق اۋرۋحاناسىنىڭ حيرۋرگتارى كەۋدە قۋىسىنىڭ پىشاق جاراقاتىمەن تۇسكەن 23 جاستاعى جىگىتتىڭ ءومىرىن ساقتاپ قالعان.

"پاسيەنت تۇنگى ۇشتەر شاماسىندا جەتكىزىلدى، دەرەۋ وپەراسياعا الىندى. مەنىڭ حيرۋرگياداعى 36 جىلدىق جۇمىسىمدا مۇنداي جاعدايلار بولعان"، - دەيدى اۋداندىق اۋرۋحانانىڭ حيرۋرگيا ءبولىمىنىڭ مەڭگەرۋشىسى قايرات اجىبەكوۆ.

وپەراسيا 1 ساعات 20 مينۋتقا سوزىلعان. دارىگەرلەر ناۋقاستىڭ كەۋدە قۋىسىن اشىپ، جارانىڭ ورنىن تىككەن. مۇنداي جاراقاتتىڭ كۇردەلىلىگى – وپەراسيا جانە جارانى تىگۋ جۇرەكتىڭ سوعۋىن توقتاتپاي جۇمىس ىستەيتىن جۇرەككە جاسالادى.

وتادان كەيىن قان كەتۋ توقتاپ، گەموديناميكا قالپىنا كەلدى.

"حيرۋرگتار قايرات اجىبەكوۆ، ەرجان دوسالييەۆ جانە انەستەزيولوگ-رەانيماتولوگ دارىگەر داۋرەن ءابدىروۆ جاساعان وپەراسيا ءساتتى ءوتتى. پاسيەنتتىڭ ومىرىنە تونگەن ءقاۋىپ جويىلدى. ونىڭ جاعدايى تۇراقتالدى"، - دەپ مالىمدەدى مينيسترلىكتەگىلەر.