جۋرناليست-بلوگەر ماحامبەت ابجان كاسىپكەردەن 50 ملن تەڭگە بوپسالادى دەگەن كۇدىكپەن قاماۋعا الىندى، دەپ حابارلايدى Almaty-akshamy.kz Inform.kz-كە سىلتەمە جاساپ.
«سىبايلاس جەمقورلىققا قارسى قىزمەت باق-تا نۇقسان كەلتىرەتىن مالىمەتتەر تاراتۋ قاۋپىمەن كاسىپكەردەن اسا ءىرى كولەمدە اقشا قاراجاتىن بوپسالاعان ازامات م. ابجاننىڭ قىلمىستىق ارەكەتىنىڭ جولىن كەستى. 3 شىلدەدە جۇرگىزگەن ارنايى وپەراسيانىڭ ناتيجەسىندە ازامات م. ابجان 50 ميلليون تەڭگە العاننان كەيىن ۇستالىپ، نۇر-Cۇلتان قالاسىنىڭ ۋاقىتشا ۇستاۋ ورتالىعىنا قاماۋعا الىندى. م. ابجاننىڭ باسقا دا ۇقساس قىلمىستارعا قاتىستىلىعى تۋرالى اقپارات تەكسەرىلۋدە»، - دەلىنگەن رەسمي حابارلامادا.