بيىلدان باستاپ ەل ىشىندە ساياحاتتايتىن قازاقستاندىقتارعا ءتيىمدى جەڭىلدىك بەرىلدى. بالالار ۇشاقپەن تەگىن ۇشا الادى. شىعىندى مەملەكەت وتەيدى. باعدارلامانىڭ نەگىزگى ماقساتى – ىشكى ءتۋريزمدى دامىتۋ.Almaty.tv جازعى ۋاقىتتا جوعارى سۇرانىسقا يە بولاتىن Kids go free باعدارلاماسىنىڭ نەگىزگى شارتتارىن ۇسىنادى، دەپ حابارلايدى Almaty-akshamy.kz.
تەگىن ۇشاتىن بالا 2-17 جاستا بولۋ كەرەك
باعدارلاما بيىل 1 قاڭتاردان باستاپ ىسكە قوسىلدى. وعان سايكەس، كامەلەت جاسقا تولماعان بالالاردى ۇشاقپەن تەگىن تاسىمالداۋ مىندەتى ەنگىزىلىپ وتىر. ول ءۇشىن قازاقستانداعى رەسمي تۋروپەراتوردان ەل ىشىندە دەمالۋعا ارنالعان تۋريستىك پاكەت ساتىپ الۋ قاجەت.
Kids go freeء-دىڭ نەگىزگى تالاپتارىنا سايكەس، تەگىن ۇشاتىن بالا 2-17 جاس ارالىعىندا جانە قازاقستان ازاماتى بولۋى شارت. كامەلەت جاسقا تولماعان جولاۋشىنىڭ قاسىندا اتا-اناسى نەمەسە جاقىن تۋىستارى (اتاسى/اجەسى، اعاسى/اپاسى) جۇرۋگە ءتيىس.
رەسپۋبليكا بويىنشا كەز كەلگەن جەرگە ۇشىپ بارۋعا بولادى. تۋروپەراتور ءوز اقشاسىنا بالالاردىڭ اۋە بيلەتىن ساتىپ الادى، ارتىنان كومپانيانىڭ شىعىنى مەملەكەت تاراپىنان وتەلەدى.
باعدارلاماعا قاتىسۋ ءۇشىن قۇجات تاپسىرۋدىڭ قاجەتى جوق. ءتارتىبى:
ەل ىشىندە دەمالىستى جوسپارلاپ، ناقتى باراتىن جەردى انىقتاۋ؛
سول جەردە دەمالىستى ۇيىمداستىرا الاتىن تۋريستىك كومپانياعا بارىپ، تۋريستىك پاكەتتى جاساۋ؛
بالالاردىڭ اۋە بيلەتتەرىن شەگەرىپ، تۋريستىك پاكەتتى تولەۋ؛
ساياحاتقا شىعۋ؛
دەمالىستان كەيىن تۋريستىك كومپانياعا ۇشاقتا بەرىلگەن جولاۋشىلار تالونىن ۇسىنۋ.
قازىرگى كەزدە 19 تۋريستىك كومپانيا Kids go free باعدارلاماسىنا قوسىلدى. ولار بالالار بيلەتىنىڭ اقشاسىن "Kazakh Tourism" ۇلتتىق كومپانياسىنان الادى.
جىل باسىنان بەرى قانشا بالا تەگىن ۇشتى؟
رەسمي مالىمەتكە سايكەس، وسى ۋاقىتقا دەيىن 153 ءوتىنىش بويىنشا 14،1 ميلليونا تەڭگە كولەمىندە تولەم جاسالدى. وسىلايشا، 307 بالا وتباسىمەن بىرگە دەمالاتىن جەرگە تەگىن ۇشىپ باردى.
بۇگىندە Kids go free باعدارلاماسى بويىنشا تۇركىستانعا ۇشاتىن وتباسىلار كوپ. ودان كەيىنگى ورىندا الماتى جانە ماڭعىستاۋ تۇر. باعدارلاما اياسىندا ساتىپ الىناتىن تۋريستىك پاكەتتىڭ ورتاشا باعاسى - 320 مىڭ تەڭگە. ەڭ ارزان تۋر الماتى قالاسىنا 82 مىڭ تەڭگەگە ساتىلدى. ال ەڭ قىمبات تۋر اقتاۋ قالاسىنا جاسالدى. باعاسى - 1،2 ميلليون تەڭگە. بارلىق تۋر بويىنشا بالالار دەمالاتىن جەرگە ۇشاقپەن تەگىن بارىپ كەلدى.
"ءبىر وتباسى جەتى بالامەن ۇشقان. سول الماتىعا ۇشقان ءبىر وتباسىنىڭ وتەماقىسى 369،8 مىڭ تەگەگە دەيىن جەتكەن. بۇل – ەڭ ءىرى سوما. نەگىزى ءبىر ءوتىنىش اياسىندا تۋريستىك وپەراتورلارعا شامامەن 107 مىڭ تەڭگە تولەنىپ تۇرادى. سوندا ءبىر بالاعا 50-55 مىڭ تەڭگەنىڭ سۋبسيدياسى تولەنەدى"، - دەيدى كومپانيا ماماندارى.
Aviata دا Kids go free باعدارلاماسىنا قوسىلدى. كومپانيا تۋروپەراتورلارعا بالالاردىڭ اۋە بيلەتتەرىن 45 كۇنگە ءبولىپ تولەۋگە مۇمكىندىك بەرىپ وتىر.
ال Global Nomads ءاربىر تۋرعا سىياقى سەرتيفيكاتىن قوسىپ بەرۋگە مۇددەلى.