ماقساتى – وسكەلەڭ ۇرپاقتى رۋحاني تاربيەلەۋ
الماتىلىق اقجول احمەتوۆا «بيزنەستىڭ جول كارتاسى – 2025» مەملەكەتتىك باعدارلاماسى اياسىندا زەرگەرلىك بۇيىمدار جاسايتىن وندىرىستىك سەح اشۋ ءۇشىن 5 ملن تەڭگە كولەمىندە گرانت الدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
كاسىپكەر مەملەكەتتىك باعدارلاماعا قاتىسۋ ءۇشىن 2021 جىلدىڭ كوكتەمىندە «Qolday» كاسىپكەرلىك ورتالىعىندا ءوتىنىش بەرگەن. وڭىرلىك كوميسسيا مۇشەلەرىنىڭ الدىندا جوبانى ءساتتى قورعاپ، قارجى قولىنا تيگەننەن كەيىن، ارادا بىرنەشە اي وتكەن سوڭ 2021 جىلدىڭ قازان ايىندا كاسىپ سالتاناتتى تۇردە اشىلدى.
اقجول احمەتوۆا مەملەكەتتىك باعدارلامادان تۇسكەن قاراجاتقا لازەرلىك كەسۋگە، بالقىتۋعا، قۇيۋعا، كۇمىستى جىلتىراتىپ، وڭدەۋگە ارنالعان ستانوكتار، سونداي-اق قاجەتتى شيكىزاتتاردى، مىس، كۇمىس، تابيعي تاستار ساتىپ الدى.
كاسىپكەر كەلىنشەكتىڭ العاشقى كليەنتتەرى – ءوزىنىڭ تۋىستارى. ويتكەنى ولار اقجولدىڭ ەرەكشە تالعامىنا، تابيعي دارىنىنا سەنەدى. ول شاشباۋ، بىلەزىك، جۇزىك، القا سەكىلدى ءداستۇرلى زەرگەرلىك بۇيىمداردى جاڭا ءستيلدى ديزاينمەن جاسايدى. شاشباۋدىڭ ءبىر جيىنتىعى شامامەن 60 مىڭ تەڭگە تۇرادى، بىلەزىك – 20 مىڭ تەڭگە، نەكە جۇزىگى – 15 مىڭ تەڭگە. مۇنداي بۇيىمداردى ۇلتتىق ناقىشتاعى اشەكەيلەردى جوعارى باعالايتىن ادامدار قالىڭدىق جاساۋىنا، جاس جۇبايلارعا سىيلىققا، انالارىنىڭ مەرەيتويىنا، ارىپتەستەرى مەن سەرىكتەستەرىنە قۇرمەت بەلگىسى رەتىندە ساتىپ الادى.
«اتام بەلگىلى زەرگەر بولعان، مەن سول كىسىنىڭ كاسىبىن جالعاستىرسام دەپ ارمانداۋشى ەدىم. نەگىزگى ماماندىعىم – ەكولوگ جانە باستاۋىش سىنىپ ءمۇعالىمىمىن، ەكى جوعارى ءبىلىمىم بار. مەملەكەتتىك باعدارلاما مەنىڭ ارمانىمدى جۇزەگە اسىرۋىما، ۇلتتىق ناقىشتاعى زەرگەرلىك بۇيىمداردى جاسايتىن كاسىپ اشۋىما مۇمكىندىك بەردى. قازىرگى شاعىن ءوندىرىس ورنىمدا ازىرگە 2 زەرگەر، ەسەپشى جانە شارۋاشىلىق بويىنشا كومەكشىم جۇمىس ىستەيدى. مەن ماماندارعا بۇيىمنىڭ ديزاينىن جاساۋعا كومەكتەسەمىن، ءوز يدەياممەن بولىسەمىن»، – دەيدى كاسىپكەر اقجول احمەتوۆا.
ونىڭ ايتۋىنشا، وسىنداي كاسىپ اشۋىنىڭ نەگىزگى ماقساتى – وسكەلەڭ ۇرپاقتى رۋحاني-ادامگەرشىلىك تۇرعىدا تاربيەلەۋ، ۇلى دالا نىشاندارىن قايتا جاڭعىرتۋ.
«ەرتەدە ۇلكەن اجەلەرىمىز بوي جەتىپ كەلە جاتقان قىزدىڭ شاشىنا شاشباۋ تاعاتىن بولعان. شاشباۋدىڭ سىڭعىرى نەعۇرلىم قاتتى ەستىلسە، قىز سىپايى بولۋى ءۇشىن سوعۇرلىم ەسكەرتۋلەر جاساپ وتىرعان. وسىلايشا تال شىبىقتاي بۇرالىپ ءوسىپ كەلە جاتقان قىزدىڭ ءجۇرىسى اققۋداي، مىنەزى مامىقتاي، ادەپتى ءارى بايىپتى بولۋىنا شاشباۋدىڭ تيگىزەر پايداسى كوپ. كۇمىس بىلەزىكتەر ايەل ادامدار اس ۇيدە جۇمىس ىستەگەن كەزىندە تازالىق ساقتاۋعا كومەكتەسەتىن ماڭىزدى قۇرال رەتىندە قولدانىلعان. اشەكەيلەرگە سالىنعان ءاربىر سۋرەت پەن ورنەكتىڭ وزىندىك ماعىناسى بار، ولار ادامدى سۇق كوزدەن، قارا نيەتتەن قورعايدى. كۇمىس التىننان دا باعالى، پايدالى مەتالل دەپ سانالعان. مىسالى، ەگەر كۇمىس قارايىپ كەتسە، سول اشەكەيدى تاعىپ جۇرگەن ادامنىڭ دەنساۋلىعى سىر بەردى دەگەن ءسوز. سونداي-اق يسلام دىنىندە دە كۇمىستىڭ پايداسى مەن ەرەكشەلىگى تۋرالى ايتىلادى. سوندىقتان مەن كوپشىلىكتىڭ نازارىن وسىعان اۋدارعىم كەلەدى، اشەكەي الاردا كۇمىستى تاڭداسا ەكەن دەگەن تىلەگىم بار، – دەيدى اقجول احمەتوۆا.