مۇنداي پىكىردى ۇكىمەت باسشىسى ءاليحان سمايىلوۆ كەلتىردى.
ول بيزنەسكە قويىلاتىن تالاپتاردىڭ ەسكىرگەنىن العا تارتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەملەكەت باسشىسى بيزنەسكە قويىلاتىن تالاپتاردى ازايتۋ ءۇشىن بۇل سالانى رەتتەۋ جۇيەسىن قايتا قاراۋدى تاپسىرعان بولاتىن.
قازىرگى كەزدە مۇنداي تالاپتاردىڭ 40%-ى جاڭا تاسىلدەرگە سايكەس كەلمەيدى. سوندىقتان، ولاردى توقتاتۋ كەرەك. قاجەتتى شەشىمدەر قابىلداندى. ءتيىستى زاڭعا قول قويىلدى. ەندى ونى ىسكە اسىرۋ قاجەت»، - دەگەن ۇكىمەت باسشىسى بيزنەس شامادان تىس اكىمشىلىك جۇكتەمەنىڭ ازايعانىن سەزىنە باستاۋى كەرەك ەكەنىن ەسكەرتتى.
«ول ءۇشىن مىندەتتى تالاپتار رەەسترىن جاساۋىمىز كەرەك. رەتتەۋ جۇيەسىن وزگەرتۋ بيزنەس سالاسىن ءتيىمدى رەفورمالاۋعا جانە ونى دامىتۋعا جاڭا سەرپىن بەرەدى»، - دەدى ءاليحان سمايىلوۆ.
اتالمىش ماسەلە بويىنشا پرەمەر-مينيستر بىرنەشە تاپسىرما بەردى.