پارلامەنت سەناتىنىڭ ءتوراعاسى ماۋلەن اشىمبايەۆ باستاعان اتوم ەلەكتر ستانساسىن سالۋدى قولداۋ جونىندەگى حالىقتىق شتاب الماتى وبلىسىنا جۇمىس ساپارىمەن كەلدى.
شتاب قۇرامىنا دەپۋتاتتار، ساراپشىلار جانە قوعام قايراتكەرلەرى كىرىپ، وڭىردەگى كاسىپورىن ۇجىمدارىمەن، كاسىپكەرلەرمەن جانە جەرگىلىكتى تۇرعىندارمەن كەزدەستى. كەزدەسۋلەردىڭ باستى ماقساتى — قازاقستاندا اەس سالۋعا قاتىستى رەفەرەندۋم وتكىزۋ ماسەلەسىن تالقىلاۋ.
ماۋلەن اشىمبايەۆ كەزدەسۋدە مەملەكەت باسشىسى قاسىم-جومارت توقايەۆتىڭ اەس سالۋ جونىندەگى جالپىۇلتتىق رەفەرەندۋم وتكىزۋ باستاماسىنىڭ ماڭىزدىلىعىن اتاپ ءوتتى.
«بۇگىن ءبىز وسىندا پرەزيدەنتىمىز قاسىم-جومارت كەمەل ۇلى توقايەۆتىڭ باستاماسىمەن ەلىمىزدە اەس سالۋ ماسەلەسى بويىنشا رەسپۋبليكالىق رەفەرەندۋم وتكىزۋ ماسەلەسىن تالقىلاۋ ءۇشىن كەلدىك. بۇل ماڭىزدى قادام — "حالىق ۇنىنە قۇلاق اساتىن مەملەكەت" تۇجىرىمداماسىنىڭ ناقتى كورىنىسى. وسى رەفەرەندۋم ارقىلى ءبىز قوعامنىڭ پىكىرىن ەسكەرىپ، ەلدىڭ بولاشاعىنا قاتىستى شەشىم قابىلدايتىن بولامىز. اەس سالۋ قازاقستاننىڭ ەنەرگەتيكالىق تاۋەلسىزدىگىن نىعايتۋعا، ەكولوگيالىق تازا ەنەرگيا وندىرۋگە جانە ەكونوميكالىق وسىمگە جول اشادى. سوندىقتان قازاقستاندىقتاردىڭ بۇل باستامانى قولدايتىنىنا سەنىمىم مول»، – دەدى ماۋلەن اشىمبايەۆ.
كەزدەسۋدە اەس قۇرىلىسىنىڭ ەلدىڭ ەنەرگەتيكالىق تۇراقتىلىعىن ارتتىرىپ، ينۆەستيسيا تارتۋعا جانە جاڭا جۇمىس ورىندارىن اشۋعا ىقپال ەتەتىنى ايتىلدى. سونداي-اق، حالىقتىڭ بەلسەندى قاتىسۋى جانە رەفەرەندۋم ارقىلى ءوز پىكىرىن ءبىلدىرۋى ەلدىڭ بولاشاعى ءۇشىن ماڭىزدى شەشىم ەكەنى اتاپ ءوتىلدى.